MIPAHIMANGNO si Gobernador Aris Aumentado sa publiko, mga motorista ug mga turista sa pag-andam sa mas hugot nga seguridad sa tibuok probinsya samtang nagpadayon ang mga high-level nga miting sa ASEAN, uban sa pag-apil sa mga senior economic officials ug delegado gikan sa mga ASEAN member-states, ubos sa Philippines’ 2026 ASEAN Chairmanship.
Gibutyag ni Aumentado nga posible nga makabantay ang publiko sa mas daghang presensya sa kapulisan ug uban pang uniformed personnel sa mga nag-unang dalan ug mga tourist destinations, ilabi na sa Panglao Island, diin gi-host ang kadaghanan sa mga miting.
Miingon usab siya nga magpadayon ang hugot nga security operations sa umaabot nga mga semana aron masiguro ang kaluwasan sa publiko, pagmintinar sa kalinaw ug kahusay, ug pagpasiguro sa hapsay nga pagdumala sa mga internasyonal nga kalihokan.
Giawhag sa gobernador ang publiko sa pagpakita og kooperasyon ug pasensya, nga ang mga lakang nga gipahamtang kinahanglanon tungod sa papel sa Bohol isip usa sa mga host provinces sa ASEAN-related activities.
Gipasigarbo usab ni Aumentado ang pag-host sa ASEAN meetings ingon usa ka dakong milestone alang sa probinsya, ug giingon nga ang pagkahimong unang UNESCO Global Geopark ug Regenerative Island sa nasud usa ka oportunidad aron ipakita sa kalibutan ang natural nga panulondon, kultura, ug maayong pagdumala sa Bohol.
Gidugang pa niya nga ang pag-abot sa mga delegado ug bisita gilauman nga mopadasig sa lokal nga ekonomiya, nga makabenepisyo sa mga negosyo sa accommodation, transportasyon, pagkaon, serbisyo, ug creative industries.
Gipahibalo sa provincial government nga magpadayon ang ilang paningkamot sa paghatag og luwas, segurado, ug maabiabihong palibot alang sa mga residente ug bisita, subay sa tema sa ASEAN Philippines 2026 nga “Navigating Our Future, together.”
AFP FULL ALERT
NAGDEPLOY ang Armed Forces of the Philippines (AFP) og mga personnel, specialized units, ug military assets aron suportahan ang security operations alang sa high-level ASEAN Summit meetings nga gi-host sa Bohol gikan Enero 19 hangtod Enero 31, 2026, diha sa Panglao Island.
Sumala ni Lt. Col. Dennis Martinez, Deputy Commander sa Special Task Group (STG) ug Commanding Officer sa 47th Infantry Battalion sa Philippine Army nga nakabase sa Bohol, ang AFP naghatag og komprehensibong suporta sa seguridad aron masiguro ang kaluwasan sa mga ASEAN delegates ug ang hapsay nga pagdumala sa summit.
Matod ni Martinez, nagdeploy ang Philippine Army og mga sundalo, specialized units, ug military assets aron mosuporta ug motabang sa Philippine National Police (PNP), Philippine Coast Guard (PCG), Bureau of Fire Protection (BFP), ug ubang ahensya sa gobyerno nga nagseguro sa mga venue sa miting, mga ruta sa convoy, ug uban pang giila nga mga lugar alang sa paspas nga response.
Nagdeploy usab ang Philippine Air Force og duha ka Black Hawk helicopters nga nakapwesto sa Bohol–Panglao International Airport, diin ginahimo ang duha ka reconnaissance flights matag-adlaw sa nagkadaiyang bahin sa probinsya isip kabahin sa hugot nga security operations.
Samtang, ang Philippine Navy nagbutang og mga barko ug units sa Tagbilaran City Port aron palig-onon ang maritime security ug maghatag og mobility support atol sa summit period.
Gipahayag sa AFP nga ang maong deployment kabahin sa ilang suporta sa Peace, Order, Safety, Security, ug Emergency Response Task Group sa Bohol, nga tumong ang pagmintinar sa luwas ug seguradong palibot sa tibuok ASEAN Summit meetings. (RTB)
