GIHISGUTAN ni Bohol Governor Aris Aumentado ug Department of Energy (DOE) Secretary Sharon Garin ang mga plano ug proyekto sa enerhiya aron masiguro ang power sufficiency sa probinsya, atol sa ilang miting sa usa ka Welcome Dinner sa Special ASEAN Senior Officials Meeting on Energy (SOME) didto sa South Palms Resort and Spa sa Panglao niadtong Enero 21.
Sa miting, gipahibalo ni Gov. Aumentado si Sec. Garin sa partnership sa Bohol Island State University (BISU) alang sa pag-ila sa mga lugar sa Bohol nga angayang mahimong tinubdan sa renewable energy, lakip ang solar ug hydroelectric power. Gituki usab ang padayon nga paningkamot sa probinsya sa pagpalapad sa paggamit sa limpyo ug malungtarong enerhiya.
Gidayeg ni Sec. Garin ang mga inisyatiba sa Bohol, ilabi na ang pagkauna niini sa pagpatuman og ordinansa alang sa renewable energy plans ug ang pagkatukod sa Bohol Renewable Energy Board (BREB).
Mitambong sa miting si Provincial Administrator Asteria Caberte ug Provincial Legal Officer Atty. Handel Lagunay; samtang kauban ni Sec. Garin ang mga undersecretaries ug assistant secretaries sa DOE. Nitambong usab ang mga power distributors ug electric companies sa Bohol aron mapalalom ang kooperasyon sa sektor sa enerhiya.
Human sa miting, ang Province of Bohol ug ang DOE nag-host sa Welcome Dinner alang sa mga ASEAN SOME delegates, kauban si Panglao Mayor Boy Arcay ug iyang kapikas nga si Annie Arcay isip host LGU. (RTB)
