GIDISMISS sa Commission on Elections (COMELEC) First Division ang election protest nga gisang-at sa kaalyado ni kanhi Tagbilaran City mayoralty candidate Atoy Torralba batok sa mga nidaog nga Team Asenso Pa More nga miyembro sa Sangguniang Panlungsod sa Tagbilaran City, human sa May 2025 National ug Local Elections.
Sa Election Protest Case (EPC) No. 2025-015, giingon sa COMELEC nga kulang sa porma ug unod o “insufficient in form and substance” ang protesta nga gisang-at ni Joseph Lamdagan, usa ka napildi nga kandidato sa konsehal, busa angayang ibasura sa walay langan.
Gipangayo ni Lamdagan ang pag-annul sa proklamasyon sa napulo ka nidaog nga konsehal, tungod sa giingong mga iregularidad sa Automatic Counting Machines (ACM) ug Election Management System (EMS).
Apan, mi-ingon ang COMELEC First Division nga gilangkuban nila Presiding Commissioner Aimee Ferolino ug Commissioners Ernesto Ferdinand Maceda Jr. ug Maria Norina Tangaro-Casingal nga walay igo ug klarong ebidensya ang mga alegasyon ug puro espekulasyon lamang.
Gipatin-aw sa Komisyon nga ang software nga gigamit sa eleksyon maoy final trusted version nga miagi sa independent audit, lakip ang Pro V&V, ug gipasiugda nga ang Random Manual Audit nagpakita og 99.99902 porsyento nga accuracy rate.
Giingon usab sa COMELEC nga ang mga ulahi sa data transmission tungod lamang sa teknikal nga proseso sa pag-convert sa datos, ug dili ebidensya sa pagpanghilabot sa resulta sa eleksyon.
Ang desisyon, nga gipirmahan niadtong Disyembre 15, 2025, nagapadayon sa balido nga proklamasyon ug kadaogan sa mga Asenso Pa More nga konsehal sa Tagbilaran City. (RTB)
