GIPAHAYAG sa Department of Health (DOH) kagahapong adlawa, Enero 13 nga ang mga kaso nga nalambigit sa gitawag nga “super flu” nagpabilin sulod sa lebel sa seasonal influenza ug wala magpasabot nga kini makapaalarma, tungod kay wala’y misaka nga ihap sa severe respiratory diseases.
Sa usa ka interbyu, gitin-aa sa DOH spokesperson nga si Assistant Secretary Dr. Albert Domingo nga sa 63 ka mga kaso nga nareport sa 2025 sa tibuok tuig ug dili resulta sa kalit nga pagsaka sa mga kaso.
Sumala pa niya, ang influenza-related illnesses misaka lamang og 1% kon itandi sa miaging tuig—usa ka kausaban nga giingon niyang statistically insignificant.
Gipasabot sa DOH nga ang “super flu” dili bag-ong sakit kondili usa ra ka kini ka variant sa Influenza A, teknikal nga gitawag og subclade K ilalom sa H3N2 lineage. Ang super flu usa ra ka variant sa influenza A. Pareho ra gihapon ang mga sintomas—hilanat, ubo, sip-on, ug panakit sa lawas. Ang kalainan lang, mas paspas kini nga makatakod matud pa ni Domingo.
Bisan pa man sa mas taas nga transmissibility, gipahayag sa DOH nga kadaghanan sa mga kaso mild ra ug Wala na magkinahanglan pa sa pagpaospital.
Giklaro usab sa DOH nga wala’y ebidensiya nga ang virus mosangpot og pneumonia o mas grabe nga kahimtang.
Kadaghanan sa mga kaso nagpabilin ra nga sama sa trangkaso nga sakit ug dili kinahanglan pa sa pagpahospital.
Base sa datos sa DOH, adunay 24,091 ka kaso sa severe acute respiratory infection (SARI) nga narecord sa 2025 hangtod Disyembre 27 diin 14 ra ka mga kaso ang nalambigit sa subclade K variant o 0.06%.
Gipasabot usab nga ang kadaghanan sa SARI cases hinungdan sa ubang virus sama sa rhinovirus ug respiratory syncytial virus (RSV), samtang ang influenza ika-upat ra sa lista.
Gipasalig sa DOH ngadto sa publiko nga ang kasamtangang flu vaccine epektibo gihapon batok sa subclade K variant, subay sa giya sa World Health Organization (WHO).
Sa padayon nga flu season, gihangyo sa DOH ang publiko nga sundon ang basic health measures aron malikayan ang pagkaylap sa sakit. Kini naglakip sa kanunayng paghugas sa kamot, magpahuway ug magpabilin sa balay kon adunay gibati nga sakit, magsul-ob og face mask kon mogawas, ug mokaon og prutas ug gulay aron padayong lig-on ang immune system.
Sa samang interbyu, gi-report usab sa DOH nga misaka og 32% ang mga kaso sa tipdas (measles), nga adunay 5,123 ka kaso nga narecord hangtod Disyembre 27, kumpara sa 3,880 ka kaso sa miaging tuig.
Ang pinakadaghan nga mga kaso narecord sa Metro Manila, gisundan sa Bangsamoro Autonomous Region in Muslim Mindanao (BARMM) ug Calabarzon.
Aron mapugngan ang pagkaylap sa tipdas, gipalapdan karon sa DOH ang ilang immunization efforts, ilabi na sa pagsugod sa Ramadan.
Gipahinumdoman sa DOH ang mga ginikanan ug tig-atiman sa mga bata nga pahimuslan ang libreng bakuna aron mapanalipdan ang kahimsog sa kabataan ug malikayan ang mas seryosong komplikasyon sa sakit nga tipdas. (RTB)
