MIPASAR ang 16th Sangguniang Panlungsod sa Tagbilaran sa ordinansa nga nagmando og mandatory drug testing para sa tanang drayber sa public utility vehicles (PUVs) sa dakbayan.
Gipangamhanan ug gisponsor ni City Councilor Fausto “Bebot” Budlong, chairman sa Committee on Peace, Order and Public Safety ang Proposed Ordinance No. 02-26 nagmando nga ang mga drayber sa bus, jeepney, taxi, ug tricycle moagi og random drug testing aron masiguro nga walay tig-gamit og droga sa pampublikong transportasyon.
Ang ordinansa gisugyot sa Tagbilaran City People’s Council (TCPC) ug gisugyot sa Committee on Peace, Public Order, and Safety pinaagi sa ilang report kaniadtong Enero 7, 2026.
Mga Pangunang Probisyon mao ang Mandatory Testing: Ang mga random drug test ipahigayon minimum kausa sa matag bulan sa Tagbilaran City Primary Care Facility (TCPCF) kauban ang lokal nga kapulisan ug traffic management office.
Silot sa mga Drayber:1st Offense: Unom ka bulan nga drug rehabilitation, bayran sa drayber o pinaagi sa programa sa lungsod, 2nd Offense: Permanenteng bawal sa pag-drive sa PUV sa Tagbilaran ug rekomendasyon sa Land Transportation Office (LTO) alang sa kanselasyon sa lisensya.
Silot sa Tag-iya/Operator sa Sakyanan: 1st Offense: Suspendido ang permit sulod sa duha ka bulan, 2nd Offense: Suspendido ang permit sulod sa upat ka bulan, 3rd Offense: Pagtangtang sa franchise.
Matod sa komitiba nga daghang traffic violation ang may kalabutan sa ilegal nga droga.
Pinaagi niini nga ordinansa, ang dakbayan sa Tagbilaran nagtumong sa pagpakunhod sa aksidente ug pagpasiugda sa pinakataas nga lebel sa alertness ug responsibilidad sa mga drayber nga nagbantay sa kinabuhi sa publiko.
Ang ordinansa gi-aprobahan sa Third and Final Reading atol sa regular nga sesyon sa Sangguniang Panlungsod gipangulohan ni City Vice-Mayor Adam Relson Jala, kagahapon, Enero 13, 2026, ug magsugod kini15 ka adlaw human sa opisyal nga publikasyon ug pag-post sa makita nga mga lugar sa dakbayan. (RTB)
