EPEKTIBO na niadtong January 6, 2026 ang Provincial Ordinance No. 2025-029 nga nagmando sa hugot nga pagpatuman sa Presidential Decree 449 o Cockfighting Law of 1974, nga klarong nagdili sa paggamit og machine, kiosk o electronic betting sa tanang buwangan o sabungan sulod sa probinsya sa Bohol.
December 1, 2025 sa dihang gipirmahan ang ordinansa ni Gobernador Aris Aumentado, December 21, 2025 sa dihang gi published kini lokal nga pamantalaan og human sa 15 ka adlaw nga publication epektibo na ang pagpatuman sa balaud.
Ang ordinansa nga gi sinuwat ug gi sponsoran nila ni Board member Romulo Cepedoza ug Board member Venzencio Arcamo nga gipasar sa Sangguniang Panlalawigan sa Bohol, nagtugot lamang sa tradisyunal nga pamaagi sa pagpusta sa sabong, diin ang mga sabongero o manayaay anha lang sulod sa lisensyadong sabungan ug ang pusta himoon pinaagi sa llamador o promoter, sumala sa resulta nga ipahibalo sa sentenciador.
Sumala sa ordinansa, bisan pa sa nasudnong pagsuspenso sa e-sabong niadtong Mayo 3, 2022 ug sa Executive Order No. 09 nga nagpadayon sa maong suspensyon, midaghan gihapon ang mga offshoot niini sama sa betting kiosks ug machine betting sa pipila ka sabungan. Giingon nga delikado kini alang sa mga mamustaay tungod kay dili klaro ang pamaagi, ug usahay mausab pa bisan human mabutang ang pusta o taliwala sa duwa.
Gipasabot sa Ordinansa nga samtang legal ang sabong isip tradisyon ug kalingawan sa Pilipino, gikinahanglan usab ang pagpanalipod sa katawhan batok sa rigged ug dili kasaligan nga pamaagi sa pagpusta nga mahimong mosangpot sa pinansyal ug emosyonal nga kadaut.
Ilawom sa ordinansa, ginadili ug gideklarar nga ilegal ang tanang porma sa machine, kiosk, ug electronic betting sa sabong sulod sa teritoryo sa Bohol. Ang tanang local government units gimandoan nga siguruhon nga tradisyunal ra nga pamaagi sa sabong ug pagpusta ang tugotan sa pag-isyu og permit. Ang permit nga mapamatud-ang nakalapas sa ordinansa awtomatikong kanselado o i-revoke.
Gitahasan ang mga LGU, inubanan sa Bohol Provincial Police Office (BPPO) ug lokal nga kapulisan, sa pagmonitor, pagpadlock sa pasilidad, ug pagkumpiska sa mga betting machine nga gamiton sa paglapas sa balaod.
Lakip sa silot ang pagka priso nga usa ka tuig ug multa nga dili molapas sa ₱5,000 alang sa mga tag-iya o operator sa sabungan nga mogamit og machine betting. Alang sa mga juridical persons, ang presidente, manager, o responsable nga opisyal ang manubag. Ang mga tag-iya sa sabungan nga magpahulam sa ilang pasilidad sa mga molapas sa ordinansa pagamultahan usab og ₱5,000 ug revoke sa business permit.
Gilauman nga ang maong lakang makatabang sa pagpanalipod sa moralidad, mental health, ug ekonomikanhong kahimtangan sa mga Bol-anon, samtang ginapadayon ang tradisyunal ug lehitimong porma sa sabong sa lalawigan. (RTB)
