GIMANDOAN karon sa Department of Transportation (DOTr) ang Land Transportation Office (LTO) nga ihunong na ang pag-imbargo sa driver’s license sa mga motorista nga malambigit sa mga traffic violation subay sa bag-ong kamanduan nga gipagawas ni Acting Transportation Secretary Giovanni Lopez niadtong Enero 9, 2026.
Kini nga lakang gihimo aron mapahapsay ang proseso sa pagdakop ug malikayan ang kalibog sa publiko, diin imbes nga kuhaon ang pisikal nga kard, ang lisensya mopaubos na lang sa “alert status” sa sistema sa LTO samtang wala pa ma-settle ang multa.
Dugang niini, giusab usab ang tagal sa paghusay sa mga kaso sa trapiko gikan sa 15 ka calendar days ngadto na sa 15 ka working days, nga nagpasabot nga dili na ihapon ang mga Sabado, Dominggo, ug mga holiday sa pag-ihap sa deadline sa pagbayad sa multa o pag-contest sa violation.
Kini nga kausaban gipatuman human sa mga reklamo sa mga motorista nga naglisod sa pag-settle sa ilang mga obligasyon kon ang deadline matunong sa mga adlaw nga sirado ang mga opisina sa gobyerno, ug kini subay usab sa direktiba ni Presidente Ferdinand Marcos Jr. nga sigurohon ang mas episyente nga serbisyo sa gobyerno.
Giklaro hinuon sa LTO nga bisan og anaa pa sa kamot sa drayber ang iyang lisensya, ang pagpakyas sa pag-settle sa violation sulod sa 15 ka working days moresulta gihapon sa pagka-suspende sa lisensya sa ilang database, butang nga makababag na unya sa pag-renew niini sa umaabot. (RTB)
