GIPAHALIPAYAN sa liderato sa Philippine National Police (PNP) ang Bohol Police Provincial Police Office (BPPO) gipamunoan ni Provincial Director Police Colonel Patricio Degay Jr. human sa usa ka dakong drug bust nga nasakmit ang hapit ₱70 milyon nga kantidad sa shabu.
Ang operasyon gihimo niadtong Enero 6, 2026, dinhe sa dakbayan sa Tagbilaran, ug giila nga usa sa labing dako nga drug haul sa rehiyon karong tuiga.
Miingon si Acting PNP Chief PLTGEN Jose Melencio Nartatez Jr., nga kini nagpadala ug klarong mensahe: wala’y lugar ang droga sa atong komunidad.
Gipasidunggan niya ang BPPO sa ilang intelligence-driven ug paspas nga operasyon, ug gihangyo ang publiko nga magpadayon sa pagbantay ug kooperasyon aron mapadayon ang kaluwasan sa komunidad.
Giaghat usab ang publiko nga padayong igmat, tungod kay importante ang suporta sa komunidad aron mapadayon ang anti-drug nga kalampusan.
KASO GIPASAKA NA
Gipasaka na kaniadtong Enero 8, 2026, ang pormal nga kaso batok sa duha ka high-value drug suspects nga nalambigit sa usa ka pinakadakong shabu haul sa Bohol.
Ang Bohol Police Provincial Office (BPPO) nipasaka og kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002 batok sa suspeks, didto sa Tagbilaran City Prosecutor’s Office, ug prosecutor nga mi-inquest mao si Prosecutor Eleanor Delantar-Cagas.
Ang mga suspetsado mao sila si Felix Gallogo, 39 anyos, alias “Babals,” residente sa Canmanico, Valencia, Bohol ug si Leonie Lambuson, 47 anyos, minyo, residente sa Magdaong Drive, Poblacion, Muntinlupa City ug lumad nga taga Calaca-an, Iloilo.
Nadakpan sila sa usa ka buy-bust operation didto sa Binayran Road, Dampas, Tagbilaran City, niadtong Enero 6, 2025. Pareho silang gilista sa BPPO drug watchlist isip High-Value Individuals (HVI).
Sumala sa Bohol Forensics Unit, ang laboratory tests nagpamatuod nga kumpirmadong shabu ang nasakmit gikan sa mga suspek ug adunay timbang nga 10,063.7 grams.
Gipangulohan ang operasyon sa BPPO ni Provincial Director Police Colonel Patricio Degay Jr., pinaagi sa Provincial Intelligence Branch ug Provincial Drug Enforcement Unit ubos ni PLt. Col. Joemar Pomarejos, ug gisuportahan sa Tagbilaran City Police ubos ni PLt. Col. John Kareen Escober.
Ang mga suspetsado karon gidetain sa Tagbilaran City Police Station samtang nagpaabot og commitment order nga ibalhog sa Tagbilaran City District Jail.
Giingon sa BPPO nga kini ang pinakadakong shabu seizure sa ilalum sa liderato ni PCol. Degay, usa ka dakong kadaogan sa pakigbatok sa ilegal nga droga sa Bohol. (RTB)
