KANIADTONG Disyembre 25, samtang gisaulog ang Pasko, nanguna si Governor Aris Aumentado kauban ang iyang pamilya ug mga suod nga higala sa paghandum sa ika-13 nga anibersaryo sa kamatayon sa iyang amahan, ang late Erico “Boyles” Aumentado.
Uban sa Gobernador sa paghandum ang iyang inahan nga si Madam Grenie Aumentado, mga igsoon, pag-umangkon, ug ubang suod nga higala sa pamilya.
Namalandong si Governor Aumentado sa kahimoan sa iyang amahan sa politika, diin iyang giingon nga ang kanhi Presidente Carlos P. Garcia maoy nagdasig kang Erico Aumentado sa pagsulod sa politika niadtong 1967.
Sa edad nga 27, nahimong labing batan-ong provincial board member sa Bohol si Erico. Niadtong 1988, napili siya isip Vice Governor, ug niadtong 1992, nahimong Representative sa 2nd District sa Bohol sulod sa tulo ka sunod-sunod nga termino hangtod 2001.
Sa iyang panahon sa Kongreso, nahimong Deputy Speaker sa House of Representatives sa 11th Congress (2000–2001) si Erico Aumentado, nagdumala sa Ethics and Privileges Committee, ug miyembro sa daghang importanteng komitiba sama sa Agriculture and Food, Appropriations, Education and Culture, Good Governance and Public Accountability, Local Government, Public Works and Highways, Electoral Reforms, Tourism, Transportation, ug Ways and Means.
Niserbisyo si Erico Aumentado sa tulo ka sunod-sunod nga termino isip Gobernador sa Bohol (2001–2010), nahimong chairman sa Regional Development Council ug Regional Tourism Council sa Central Visayas, ug nahimong National President sa League of Provinces of the Philippines (LPP) ug Union of Local Authorities of the Philippines (ULAP), ang una nga Bol-anon nga nakab-ot niini nga posisyon.
Human sa iyang termino isip gobernador, mibalik siya sa Kongreso niadtong 2010 hangtod sa iyang kalit nga kamatayon niadtong 2012, ug ang iyang anak nga si Aris ang mihulip sa iyang katungdanan pito ka bulan human sa iyang kamatayon.
Gihingusgan ni Governor Aumentado nga padayon niyang giampingan, ihalad ang panumduman ug kabilin sa iyang amahan, sa pagpasidungog sa mga kontribusyon ni Erico “Boyles” Aumentado alang sa katawhan sa Bohol ug sa nasud. (RTB)
