USA ka pahibalo sa seguridad ang gi-isyu karon ngadto sa mga motorista sa Dakbayan sa Tagbilaran human gitaho ang usa ka insidente sa “Bukas Kotse” niadtong bisperas sa Pasko.
Base sa impormasyon nga gipaambit sa netizen nga si Eniakie Malalis, nahitabo ang insidente niadtong Disyembre 24, 2025, sa may alas 11:20 sa gabii diha sa dapit sa Hontanosas Extension, Tagbilaran City.
Matod sa report, gipahimuslan sa mga wala pa mailhing suspek ang kamingaw sa dapit aron biktimahon ang mga sakyanan nga nakaparada sa maong area. Wala pa hinuon matino kon unsa ang mga mahalong butang nga nahanaw gikan sa maong insidente.
Tungod niini, giawhag ang publiko, ilabi na ang mga nanag-iya og sakyanan, sa pagsunod niining mga tips alang sa seguridad sama sa pagsiguro nga naka-lock ang tanang pultahan sa sakyanan sa dili pa kini biyaan.
Ayaw pagbilin og mga mahalong butang (sama sa laptop, cellphone, o kwarta) nga makit-an gikan sa gawas sa bintana. Kon mahimo, iparada ang sakyanan sa dapit nga hayag ug duna’y CCTV o guwardiya.
Magpabiling mabinantayon sa mga kadudahang tawo nga maglatagaw sa mga parking area. (RTB)
