GIPAHUGTAN karon sa Bohol Police Provincial Office (BPPO) ang seguridad sa tibuok probinsya dungan sa gipaabot nga pagdagsa sa mga lokal ug langyaw nga turista alang sa selebrasyon sa Pasko ug Bag-ong Tuig.
Ubos sa liderato ni PCOL Patricio C. Degay Jr., ang Provincial Director sa BPPO, gipatuman ang mas estrikto nga mga lakang aron masiguro ang kaluwasan sa mga bisita ug sa mga Bol-anon. Pinaagi sa Bantay Turista program nga gipangulohan ni PCPT Janice C. Parcon sa Bohol Tourist Police Unit (BTPU), mas gipataas ang presensya sa kapulisan sa mga dapit nga dagsan sa mga tawo.
Isip kabahin sa preparasyon, ang mga uniformed personnel ug tourist police gibutang sa mga estratehikong dapit sama sa mga naybayon ug resorts aron mabantayan ang kaluwasan sa mga nangaligo ug malikayan ang bisan unsang krimen.
Ports ug airport aron laghatag og dinaliang tabang sa mga biyahedor ug pagmonitor sa seguridad sa mga ganghaan sa probinsya. Heritage Sites ug Simbahan alang sa pag-alalay sa mga deboto alang sa Simbang Gabi ug sa mga turista nga mobisita sa mga makasaysayanong dapit sa Bohol.
Kini nga lakang sa Bohol subay sa nasudnong direktiba sa Philippine National Police (PNP) ubos sa “Ligtas Paskuhan 2025”.
Kapin sa 100,000 ka mga pulis ang gakatag karon sa tibuok Pilipinas aron makab-ot ang tinguha nga “low crime rate” taliwala sa taas nga holiday season. (RTB)
