GIDEKLARAR sa Bohol Provincial Police Office (BPPO) nga malinawon sa kinatibuk-an ang selebrasyon sa Christmas Eve sa tibuok probinsya.
Sumala ni Police Major Rey Olar, Public Information Officer sa BPPO nga walay dagkong insidente nga nareport sa mga syudad ug municipal police station atol sa selebrasyon.
Apan, duha ka kaso sa pagka-angol tungod sa firecracker o pabuto ang natala nga mao ang usa ka lalaki didto sa Tubigon ang naangol samtang naggamit ug piccolo, samtang usa ka menor de edad didto sa Jagna ang naangol tungod sa kwitis.
Gipahayag ni PMaj. Olar nga ang mga police units, kauban ang lokal nga kagamhanan ug ubang ahensya, nagpatuman ug gipakusgan ang seguridad, lakip ang pagtaas sa police visibility sa mga pampublikong lugar, pagbutang ug mga checkpoint, ug deployment sa quick response teams. Kini nga mga lakang nakatabang sa pagsiguro sa kaluwasan sa publiko ug pagmintinar sa kalinaw ug kahapsay sa probinsya.
Gidugang niya nga si BPPO Provincial Director Police Colonel Patricio Degay Jr. ang nagpasalamat sa mga police personnel, partner agencies, ug publiko sa ilang kooperasyon sa panahon sa kapaskuhan.
Gidasig usab sa BPPO ang publiko nga magpadayon sa pagsunod sa safety protocols ug dali nga pagreport sa mga kadudahan o ilegal nga kalihokan ngadto sa mga local nga police stations. (RTB)
