UPAT ka proyekto sa managlahi nga mga dapit sa Barangay Biabas, Ubay ang giturn-over ni Congresswoman Van-van Aumentado ug Gobernador Aris Aumentado uban kang Kapitan Alvin Pobar ug mga opisyales, kantidad og P34,522,000, pondo gikan sa Provincial Government ug Nasudnong Kagamhanan karong bag-o.
Unang giinagurahan ang P10-M Rehabilitation of Multi-Purpose Building including Facilities isip Brgy. Hall ug SK Office.
Gipangusgan ang pagpalapad sa mga oportunidad alang sa mga kabatan-onan sa mga panagtapok ug kukabildo ug diskusyon alang sa pagpalambo sa maong sektor, pinaagi sa konstruksyon niining opisina alang sa mga Sangguniang Kabataan.
Giinagurahan usab ang P1-M Road Opening Project for Local Tourism isip usa ka Bia TuRisMo Fun Trail diin didto kini gipahimutang sa maanindot ug pinakahabog nga bahin sa Barangay Biabas.
Dugang kalamboan alang sa mga estudyante ug magtutudlo ang upat ka kwarto nga P13,522,000 Construction of School Building with Facilities and Site Improvements sa Ubay II Central Elementary School.
Napahimuslan na usab ang bag-ong giayo nga Multi-purpose Building (Covered Court), kantidad P10 Milyones apil ang mga pasilidad niini.
Si Congresswoman Van-van, isip representante sa Segundo Distrito, gipasalamatan ang aktibo ug lig-ong pagsuporta sa mga opisyales, hinungdan sa mas daghang oportunidad sa pag-implementar sa mga proyekto sumala sa panginahanglan sa mga konstituwente.
Si Gobernador Aumentado sa iyang bahin, nakatutok pag-pahiluna sa mga proyekto subay sa Strategic Governance Roadmap sa Kagamhanang Probinsyal, diin gitutukan niini ang turismo, edukasyon, kaayuhan sa mga kabatan-onan ug agrikultura.
Samtang si Kapitan Alvin Pobar, gipamatud-an ang limpyong panggobyerno sa administrasyon sa gobernador ug ang pagsuporta sa kongresista pagpahiluna sa mga proyekto nga mas gikinahanglan sa mga Bol-anon.
“Ang atong mga proyekto, pinaagi sa atong gobernador ug atong congresswoman, natunong gayod sumala sa atong panginahanglan. Sila kasaligan nga politiko kay saksi kita sa Barangay Biabas nga naa gibubo ang mga proyekto ngadto sa Provincial Government gikan sa National Government,” paghinubay ni Kapitan Pobar.
Ang maong kalihukan gitambungan sa kinatibuk-ang mga opisyales sa barangay ug mga lumulupyo, mga magtutudlo sa Ubay II Central Elemetary School, pinaguluhan ni Josephine Boyboy, mga opisyales sa LGU-Ubay, mga empleyado sa DPWH ug ang Three K Construction and Enterprises, Inc. (RTB)
