GIPANGHINGUSGAN sa Bureau of Fire Protection–Bohol (BFP Bohol) ang ilang fireworks inspection ug safety enforcement isip kabahin sa paningkamot sa pagpanalipod sa publiko atol sa selebrasyon sa Pasko ug Bag-ong Tuig.
Personal nga gipangulohan ni Bohol Provincial Fire Marshal Fire Superintendent Raul Bustaliño ang inspeksyon sa mga baligyaan og firecrackers ug pyrotechnics sa La Paz, Cortes, Tubigon, ug Jagna, mga lugar nga ilado sa halin sa pabuto panahon sa holidays.
Gitutokan sa inspeksyon ang pagsunod sa fire safety standards, pagsiguro nga gitugotan ug awtorisado lamang nga mga pabuto ang gibaligya, ug ang husto nga pagbutang sa mga display area aron malikayan ang sunog ug kadaut sa lawas.
Gipahinumdoman ni FSupt. Bustaliño ang mga vendors ug ang publiko nga istriktong sundon ang mga pahimangno sa kaluwasan sa paggamit sa pyrotechnics, kay ang walay pag-amping nga pagdumala sa pagpubuto mahimong hinungdan sa dakong katalagman sa kinabuhi ug kabtangan.
Giawhag usab sa BFP Bohol ang publiko nga mopili og mas luwas nga alternatibo imbes nga magpabuto ug mag-report sa mga delikado nga fireworks display ug mga paglapas, samtang padayon nga giprioridad sa mga awtoridad ang kaluwasan sa tanan ning holiday season. (RTB)
FIRE HAZARDS
Gipahimangnoan sa Bureau of Fire Protection (BFP) Bohol ang publiko nga magmatngon batok sa mga peligro sa sunog ning holiday season, ilabi na tungod sa daot nga electrical wiring ug delikadong paggamit sa firecrackers.
Kabahin kini sa kampanya sa BFP nga Oplan Ligtas na Pamayanan, nga nagpahinumdom nga bisan usa lang ka depektibong wire makapahinungdan sa sunog, labi na karon nga daghang panimalay ang naggamit og Christmas lights ug dugang nga electrical appliances.
Miingon si Provincial Fire Marshal FSupt. Raul Bustalino nga angayan kanunay susihon ang electrical connections, likayan ang overloaded nga outlets, ug gamiton lamang ang DTI-certified nga Christmas lights ug appliances.
Gipahimangnoan usab ang publiko batok sa paggamit sa ilegal ug delikadong firecrackers, nga kasagaran mosaka ang mga insidente sa sunog sa wala pa ug human sa New Year’s Eve. Gidasig ang paggamit sa community fireworks display nga gipangdumala sa mga propesyonal.
Gipahinumdom sa BFP nga likayan ipaduol sa mga bata ang firecrackers, gamiton lamang ang mga pyrotechnics sa hawan ug luwas nga lugar, mag-andam og tubig o fire extinguisher, ug siguruhong patyon pag-ayo ang mga nahibiling firecracker sa dili pa ilabay.
Sumala sa BFP nga ang kaluwasan batok sa sunog responsibilidad sa tanan. (RTB)
