UBOS sa liderato ni Gobernador Erico Aristotle Aumentado, gipahigayon sa Kagamhanang Probinsyal sa Bohol pinaagi sa Local Government Affairs (LGA) ang capacity development didto sa Bohol Cultural Center ug sa Ceremonial Hall sa Kapitolyo alang sa mga barangay opisyales, partikular sa mga Kapitanes, Barangay Secretaries ug Chief Tanods, sulod sa napulo ka adlaw, diin sentro sa diskusyon ang disaster preparedness.
Kini, aron kahatagan og dakong importansya sa sangguniang barangay ang pagpanalipod sa komunidad batok sa mga kalamidad nga sagad mahitabo ug matudluan ang katawhan nga mangandam sa kanunay alang sa luwas nga kahimtang.
Sa ikalimang adlaw sa kalihukan Disyembre 17, personal kini nga gitambungan sa Gobernador diin mikabat sa usa ka libo kapin ang partisipante nianang adlawa, sa duha ka dapit ug gisalmutan usab kini sa Liga ng mga Barangay (LnB) presidents, uban sa Sangguniang Bayan Members nga chairman sa peace and order.
Si Gobernador Aumentado namahayag nga kini mao ang ikatulong tuig nga gipahigayon ang mando niini diin sa unang tuig, gibatbat sa Gobernador ang kabahin sa Good Governance and Transparency subay sa gipatuman sa administrasyon nga limp’yong pang-gobyerno ug pagkondena sa korapsyon.
Giawhag sa Gobernador ang mga Kapitanes nga higpit ipa-monitor sa mga Chief Tanods ang barangay kung kini adunay mga tilimad-on sa presensya sa ginadiling druga ug angay nga alerto kanunay sa mga petty crimes.
Dugang ni Aumentado nga bisan pa man sa tinguha nga dagkong kalamboan dili kini makab-ot kung wala ang kolaborasyon sa kalungsuran ug kabarangayan.
Matud pa nga dako og gikatabang ang social media sa paspas nga desiminasyon sa impormasyon sa kalamboan apan kini naabuso usab gumikan sa nagdagsang nga fakes news ug paglapas sa katungod sa katawhan pinaagi sa pagpangdaot sa dungog ug tumotumo nga sugilanon.
Si Aumentado kinsa mi-admitir nga biktima usab niining character assasination sa social media, nagkanayon nga mas nag-focus hinuon kini sa pagpatuman sa limp’yong pang-gobyerno diin gitumbok usab niini ang paghatag og taas nga respeto sa katungod sa mga kababayen-an ug mga kabataan, ug ang pagpatuman sa saktong pag-liquidate sa mga pondo nga gina-download ngadto sa panudlanan sa barangay isip kabahin sa good governance.
Ang mga opisyales sa lungsod sa Jagna, Mabini, Inabanga, Getafe, Trinidad ug Sagbayan mao ang mga partisipante nianang adlawa, diin matud pa ni kanhi Mabini Mayor Stephen Rances sa LGA, mudangat pa ang maong capacity development ngadto sa Disyembre 18, 22, 23, 26 ug 29. (RTB)
