GILAGDAAN na ni Governor Aris Aumentado ang Provincial Ordinance No. 50-2025, nga nagmarka og dakong kausaban gikan sa hugot nga pagdili ngadto sa regulated entry system alang sa pagsulod sa buhi nga baboy, karne sa baboy, ug mga pork products sa probinsya.
Ubos sa Provincial Ordinance, gitugotan ang kontrolado nga pagsulod sa buhi nga baboy, karne sa baboy, ug mga processed pork products, Hugot nga dokumentasyon sa pagpasulod sa mga produktong baboy sama sa veterinary health certificates, shipping permits, ug ASF-free test results nga gikan sa accredited laboratories.
Ipatuman ang mas hugot nga pagbantay, pagsunod sa tanang rekisitos, ug pagpatuman sa full biosecurity measures sa tibuok probinsya ug gilaoman nga makapahiuli sa supply, makapastabilize sa presyo, ug mosuporta sa hinay-hinay ug responsableng pagbangon sa lokal nga hog industry.
Ang maong ordinansa mipuli sa mas hugot nga mga lakang sa miaging tuig ug gi-isip sa lokal nga mga opisyal nga usa ka hinay-hinay apan kontrolado nga pamaagi nga nag-uyon sa national zoning ug movement protocols.
Gipirmahan ni Gov. Aris Aumentado ang ordinansa niadtong Nobyembre 28, 2025, ug mamahimong epektibo human sa 15 ka adlaw gikan sa pagmantala niini sa usa ka lokal nga mantalaan o pagbutang sa mga tin-aw nga lugar sa probinsya.
Gilaoman nga karong Pasko 2025 ug Bag-ong Tuig 2026 makapalit na sa dugang ug branded nga pork products ang mga Bol-anon para sa Noche Buena ug Midya Noche.
Ang author ug sponsor sa Provincial Ordinance mao si Board Member Lucille Lagunay, co-sponsors mao sila si Board Member Nathaniel Bindod, Dionisio Joseph Balite, Tita Baja ug Greg Jala. (RTB)
