GIDUSO ni First District Congressman Baba Yap ang usa ka balaodnon aron pasakaan ang kapasidad sa mga pasyente nga mahimong i-admitar sa Governor Celestino Gallares Memorial Medical Center (GCGMMC) dinhi sa Syudad sa Tagbilaran
Gikan sa kasamtangang 525 ka katre, gitinguha sa maong lehislasyon ni Cong. Baba nga himoong 1,000 ka katre ang kapasidad sa maong hospital.
Sulod sa mga milabay’ng dekada, ang Gallares Regional Hospital, nga kaniadto nailhang Provincial Hospital, padayong mipalapad dili lamang sa pagdugang ug mga edipisyo ug modernong pasilidad aron matubag ang nagkadaghang pasyente nga magpatambal sa maong hospital. Lakip na usab niini ang pagpalapad sa mga serbisyo’ng medical.
Matod pa ni Congressman Baba Yap, kinahanglan matubag ang nagkadakong panginahanglan sa nagkataas nga populasyon sa mga Bol-anon.
Gawas sa dugang kapasidad sa mga pasyente o “bed capacity”, ipasiguro usab ubos sa balaudnon nga giduso ni Cong. Baba Yap, nga ma-upgrade nga mga pasilidad ug serbisyong medical, adunay dugang mga doctor, nurses, ug mga healthcare personnel, ug lakip na ang tukmang pondo pinaagi sa nasudnong budget.
Uban sa pagtaas sa populasyon ug sa nagkadako nga panginahanglan alang sa kalidad ug dali nga pag-atiman sa panglawas, ang pagpadaghan sa bed capacity sa mga pampublikong hospital gikinahanglan gyud dayon, dugang pa ni Cong. Yap.
Alang sa kongresista sa Primero Distrito, ang iyang pagduso sa maong balaudnon usa ka mahinungdanong lakang ngadto sa paghatag og maayo, episyente, ug barato nga pag-atiman sa panglawas alang sa katawhan sa Bohol, ilabi na sa panahon sa medikal nga emerhensya ug krisis sa panglawas sa publiko. (RTB)
