SA PADAYON nga kampanya batok sa illegal nga kalihukan sa tibuok probinsya, nakasikop ang PNP Bohol og upat ka indibidwal sa duha ka anti-illegal gambling operations nga gipahigayon sa mga kapulisan sa Getafe ug Carmen karong bag-o.
Una niini, ang Getafe Municipal Police Station (MPS) ubos sa pagdumala ni PCPT Joy E. Dawa, Chief of Police, nakasikop og tulo ka mga babaye nga nasakpan mismo sa akto nga nagdula og illegal card game “tong-its”.
Ang operasyon gihimo alas 4:30 sa hapon sa nakalabay nga adlaw sa Purok 3, Barangay Tugas, Getafe. Ang mga nadakpan mga residente sa lugar, 55, 37, ug 30 anyos kasamtangang walay trabaho.
Nakumpiskar gikan kanila ang usa ka set sa baraha ug kwarta nga pusta sa duwa ug gipasaka na kanila ang kasong paglapas sa Presidential Decree 1602 (Anti-Illegal Gambling Law)
Samtang alas 8:36 kagabii, ang Carmen MPS ubos sa pamuno ni PMAJ Robert N. Lucernas, Chief of Police, nakasikop sa usa ka 22-anyos nga lalaki, residente sa Barangay Guadalupe, Carmen, nga nasakpan sa akto nga nagdawat og pusta sa illegal nga duwa nga “swertres.”
Gikan sa suspek nakumpiskar ang bet money ug gambling paraphernalia ug gpasaka na usab batok kaniya ang kaso ubos sa Republic Act No. 9287 o Anti-Illegal Gambling Law.
Ubos sa liderato ni PCOL Patricio C. Degay Jr., ang Bohol Police Provincial Office (BPPO) nagpadayon sa pagpanalipod sa katawhan ug nagpahimangno: “Likayi ang mga illegal nga kalihukan sa wala pa mahugno ang inyong kaugmaon.” (RTB)
