MALIPAYON nga gipahibawo sa Bohol Provincial Police Office (BPPO) nga hapsay ug malinawon ang pagsaulog sa kalag-kalag sa lalawigan niadtong Sabado ug Domingo, Nobyembre 1 ug 2, 2025.
Matud sa BPPO nga gasugod ang ilang deployment niadtong Oktubre 28, 2025 apan ang mga tawo nidagsa sa mga sementeriyo niadtong Nobyembre 1 ug 2.
Nakatala ang BPPO og 24,000 ka tawo nga niadto sa mga sam-ang sa syudad sa Tagbilaran lang niadtong Domingo.
Nunot niini, menos usab ang mga nakompiska nga ginadiling dad-on sulod sa mga sam-ang diin kasagaran niini mga scraper gamiton alang sa pagpanglimpiyo.
Nagpasalamat ang BPPO sa katawhan nga nisanong sa panawagan ug hangyo nila alang sa malinawon nga pag-obserba sa kalag-kalag karong tuiga.
Subay niini, si Mayor Jane Yap sa Dakbayan sa Tagbilaran nihulagway usab nga malinawon ug hapsay ang pagpahigayon sa pagsaulog sa kalag-kalag sa siyudad.
Si Yap nipasalamat sa tanang mga nitabang aron hapsay ang kasaulogan ug tungod sa sayong pagpahibalo sa mga angay ug dili angay nga buhatan diin nakahatag kini ug kahigayonan sa mga tawo nga mosunod.
Naobserbahan usab karong tuiga nga walay mga hubog ang nagmaoy sa sam-ang ug walay naninda usab diha sulod sa mga sementeriyo nga maoy nakahatag sa pagpasayon sa mga tawo nga mosulod ug mogawas.
Gibutyag ni Yap nga adunay mga nagdala og mga hait nga hinagiban apan minimal lang diin kanunay kining gilakip sa pahibalo sa mga tigbalita.
Sa kinatibuk-an, 9.5 ang grado nga gihatag sa inahan ning syudad sa kalamposan sa maong kalihukan kong i-rate kini sa 1 ngadto sa 10. (RTB)
