NADAWAT sa 67 ka barangay sa Loon ug 34 sa Tubigon ang barangay aid nga giapod-apod ni Gobernador Erico Aristotle Aumentado, Oktubre 25, didto sa Barangay Tan-awan ug Talenceras sa Tubigon ug Barangay Cantomocad ug Mocpoc Sur sa Loon, diin misumada kini ngadto sa P3,030,000, sa tag P30,000 matag barangay.
Dugang niini, mikabat og P2,035,000 ang lima ka tseke sa prayoridad nga proyekto ang gitunol usab sa gobernador para sa Tan-awan, Macaas, LGU Tubigon, ug Talenceras uban ang share niini sa sand and gravel.
Unang giduaw sa gobernador ang suok nga barangay sa Tubigon, aron sa pagsubay sa kahimtang sa komunidad ug sa mga kalsada nga kaagian sa mga mag-uuma dala ang ilang mga produkto paingon sa merkado.
Mas dali makapadangat sa suportang pinansyal kung gipanag-iya sa Kagamhanang Probinsyal ang kalsada nga nagkinahanglan sa tabang.
Bisan pa man niana, plano sa gobernador nga iapil sa proyektong Farm-to Market Road sa PRDP ang nahisgutang mga agianan aron kini matabangan.
Mapasalamaton si Tan-awan Kapitan Teodulo Olaiz sa pag-atiman sa gobernador sa konstituwente bisan pa man kung anaa sa hilit nga bahin sa Tubigon ang ilang barangay.
Ang Tan-awan adunay usa ka libo kapin ka rehistradong lumulupyo ug 500 ka mga botante.
Samtang sa laing bahin, gipanguluhan ni Kapitan Julito Babida ang asembleya sa Barangay Talenceras, Tubigon diin gipahigayon usab ang seremonya sa pagtunol sa mga hinabang sa Pangagamhanan uban kang Gobernador Aumentado, Bise Gobernador Nick Besas, Board Member Lucille Lagunay, ug Mayor Marlon Amila uban kang SB Member Hannah Gail Jao.
Gipahibalo sa gobernador ang direksyon sa iyang administrasyon ngadto sa tinud-anay nga pagserbisyo kontra korapsyon.
Gipamatud-an kini sa gobernador pinaagi sa dakong umento sa mga ayuda nga gipadangat ngadto sa kabarangayan kumpara sa kaniadto nga mga administrasyon.
Gi-download ang pondo direkta ngadto sa kabarangayan nga maoy modumala sa implementasyon, sukwahi nga ang Kapitolyo gihapon ang magbuot sa implementasyon hinungdan nga daghang barangay ang nagkalisod kaniadto pag-liquidate.
Matud sa gobernador, ang maong istilo posible nga tinubdan sa korapsyon busa sa iyang administrasyon, buot niini nga ang barangay gawasnon nga mupili ug mu-implementar sa tukmang proyekto nga gikinahanglan aron walay trampas ang liquidation.
Gidiskurahe sa gobernador ang mga opisyales nga gastuhon sa foundation day ug uban pang dili konkreto ug malungtaron nga proyekto ang buhis sa katawhan.
Gibutyag sa gobernador nga sa pagka karon mikabat na sa P141 Milyones ang kita sa administrasyon sa operasyon sa quarry. Dakong umento kaysa nakalabay nga mga administrasyon, bisan pa man kung pareho ra ang gidaghanon sa operators kaniadto ug sa kasamtangang operasyon.
Kini gumikan kay gipalig-on ang sistema sa koleksyon. Higpit nga gikondena ni Aumentado nga adunay pribadong mga indibidwal ang nakapahimulos sa koleksyon imbes nga derecho kini sa panudlanang probinsyal.
Hugtanon nga gipatuman ang sistema pabor sa kalikopan ug gisiguro niini nga ang barangay makakuha sa sakto nga pahat sa koleksyon isip mao ang dapit sa operasyon. Matud pa nga kini ang mulo kaniadto sa kabarangayan nga adunay quarry kay ang pahat dili gani kaigo nga pondohan ang programa nga mag-atiman sa kalikopan.
Apan sa kasamtangan nga administrasyon, gikalipay sa mga opisyales sa barangay nga dagko ang ilang pahat sa buhis sa sand and gravel.
Dugang niini, gidasig sa gobernador ang katawhan sa barangay nga adunay mga operasyon sa quarry pagpahigayon og random nga pagsubay sa mga delivery receipt aron kalikayan ang pag-abuso sa gidaghanon sa gikarga nga sand o gravel kumpara sa unsay gibayaran sumala sa resibo.
Gidasig sa gobernador ang mga opisyales nga magmabinantayon aron mas musaka pa ang koleksyon sa quarry.
Emosyonal ang gobernador nga namahayag nga sa iyang administrasyon, hugtanon ang pagpaningkamot kontra korapsyon ug walay basehan ang mga pangpangdaot sa iyang imahe diha sa social media, gumikan kay nagtamod ang gobernador sa iyang saad sa amahang kanhi gobernador, si anhing Erico Boyles Aumentado ug sa iyang panumpa ngadto sa katawhang Bol-anon.
Samtang sa laing bahin, sa Loon, mikabat sa P1,888,000 ang kantidad sa mga tseke sa prayoridad nga proyekto ang giturn-over sa gobernador ngadto sa Cantomocad ug sa ubang hingtungdang barangay nga mitambong sa kalihukan, uban kang Kapitana Agnes Sablas sa Cantomocad ug Kapitan Jose Lanzaderas sa Mocpoc Sur. Mitambong usab sa kalihukan si Konsehal Wilou Tan.
Si Bise Gobernador namahayag sa pagtinabangay alang sa kalamboan ug mag-amping sa madungog sa social media nga mga tumotumong sugilanon nga nagguba sa imahe sa mga nagserbisyo sa katawhan.
Samtang si Board Member Lagunay, programang pang-agrikultura ang gipahibalo sa katawhan uban ang pagpalig-on sa bereavement assistance aron mas dali kini madawat sa mga Loonanon. (RTB)
