NAPILI ang duha ka provincial board member (BM) nga top officials sa bag-ohay lang nga regional ug provincial elections sa National Movement of Young Legislators (NMYL) nga gipahigayon niadtong Septiyembre 12-13, 2025, sa Bai Hotel, Mandaue City, Cebu.
Si Second District BM Jiselle Rae “Jamie” Aumentado-Villamor maoy napiling Chairperson, samtang si BM Dionisio Joseph “Dedjay” Balite maoy magsilbing Vice Chairperson sa Bohol Chapter.
“Unsa ka dungog nga manguna pag-usab sa usa ka lig-on nga kalihukan sa aktibo, independente, ug nagkahiusa nga mga batan-ong lider sa Bohol,” sumala ni Villamor.
Gipahalipayan usab sa magbabalaod sa ikaduhang distrito ang tanang napili ug nasubli nga mga batan-ong magbabalaod ug gipasiugda ang kamahinungdanon sa kalihukan.
“Ang reorganisasyon ug piniliay dili lamang mahitungod sa pagpuno sa mga posisyon, kondili mahitungod usab sa paghiusa sa atong mga tingog, pagpalig-on sa atong katuyoan, ug pagplano sa direksyon aron mas mosanong sa mga hagit,” dugang niya.
Gipahinumdoman usab niya ang iyang mga kaubang magbabalaod sa kanunay nga pagserbisyo uban ang kaluoy, nga nag-ingon, “Sa kanunay, manguna sa hunahuna, magserbisyo uban ang kasingkasing.”
Apil nila isip provincial officers sila si San Miguel Vice Mayor June Reign Reyes isip Secretary, Buenavista Councilor Phildon Torregosa isip Assistant Secretary, Guindulman Councilor Abigail Gutang isip Treasurer, Sagbayan Councilor Angelyn Tecson Camacho isip Auditor, Alburquerque Councilor Jessica Doria isip Assistant Treasurer, ug Tubigon Councilor Gel Jao isip PRO.
Ang mga representante sa Bohol sa BOD naglakip nila ni Antiquera Councilor Al Coquilla, Balilihan Councilor Angel Mae Paña, ug Dauis Councilor Rolly Guillena para sa 1st District; Getafe Vice Mayor Casey Shaun Camacho, Danao Councilor Paul Cepedoza, ug Ubay Councilor Kim Geronimo Fuentes para sa 2nd District; ug Dimiao Councilor Jessie Paluga, Carmen Councilor Camille Unajan Ramos, ug Sevilla Councilor Glenn Rey Anino para sa 3rd District.
Alang sa Rehiyon 7, ang mga napili nga opisyal gikan sa Bohol mao sila si Dimiao Councilor Jessie Paluga isip Vice Chairperson, San Miguel Vice Mayor June Reign Reyes isip Assistant Secretary, Bien Unido Vice Mayor Leonardo Querubin Jr. isip Assistant Treasurer, ug Alburquerque Councilor Kien Alphe Garsuta isip PRO.
Nangalagad isip mga sakop sa Regional BOD mao sila si Dauis Councilor Rhea Mae Pon-Martinez, Danao Councilor Paul Cepedoza, Guindulman Councilor Abigail Gutang, ug Councilor Kevin Damalerio.
Usab, ang Third District BM Balite molingkod isip miyembro sa NMYL Region 7 Board of Directors (BOD).
“(We are) excited because kahibalo sa ilang community services (sa NMYL). Among gi-surrender among kaugalingon dili lang sa mga tawo kundi ngadto sa Ginoo,” matod ni Balite.
Gipaambit usab sa batan-ong magbabalaod ang mga inisyal nga plano sa bag-ong napili nga mga opisyal sa rehiyon, labi na ang ilang mga nag-unang prayoridad.
“Nag-meeting mi sa province ug region, ug among awhagon ang mga batan-on sa pag-apil sa agrikultura. Busa, aside sa pagkuha sa sports ug agriculture, pa-sudlon usab namo ang academe ug health,” dugang pa niya.
Nagpasalamat usab si BM Balite sa iyang mga kaubang magbabalaod, ilabi na sa napiling re-elected Chairperson, BM Villamor, sa ilang suporta sa iyang bag-ong tahas. (RTB)
