NAGPAHIGAYON ang Gov. Celestino Gallares Multi-Specialty Medical Center (GCGMSMC) nga anaa mahimutang sa Lungsod sa Cortes, sa soft opening niini didto sa GCGMSMC Pavilion sa Rolling Mills Old Road, Malayo Sur, Cortes, Septiyembre 15.
Mainitong giabiabi ni Dr. Elliot Tirol, CEO ug Medical Center Chief I sa GCGMSMC, ang tanan nga misalmot sa paglusad sa maong tambalanan ug gipasalamatan niini ang tanan nga nahimong kabahin sa maong kalampusan.
Mipahibaw kini ngadto kang Gobernador Erico Aristotle Aumentadonga ang maong hospital, kasamtangang nagatanyag sa mga serbisyong partial operationalization ug nagatutok nga maipadangat ang mas gipalapdang kalidad ug specialized health care ngadto sa Probinsya sa Bohol ug sa rehiyon sa Central Visayas.
Isip usa sa mga flagship hospital ubos sa Specialty Centers Act of 2023 (RA 11959), ang GCGMSMC magaserbisyo sa komunidad isip usa ka heart and vascular center.
Gikatakda nga palapdan ang maong mga serbisyo ngadto sa Lung Center, Kidney & Transplant Center ug Cancer Center sa diha nga makab-ot na niini ang status sa Basic Comprehensive Center.
Gipahigayon ang pagbukas kun unveiling sa Commemorative Marker sa GCGMSMC ug ang site tour sa mga bisita ngadto sa Building A sa maong hospital.
Ang Undersecretary sa Department of Health, Central Visayas Region nga si Dr. Mary Ann Palermo-Maestral, mipadangat sa pahalipay ngadto sa GCGMSMC pinaagi sa iyang mensahe ug mipahinumdom nga gikinahanglang ihatag ang paghigugma ug pag-atiman ngadto sa mga pasyente nga daw sama nga sila ilang kaugalingon nga pamilya, tungod kay miduol sila sa tambalanan gumikan kay nagkinahanglan sila og tabang.
Si Kongresista John Geesnell “Baba” Yap II, mihulagway sa GCGMSMC nga usa ka simbolo sa hiniusang determinasyon pagpauswag sa kahimtang sa katawhan diin kini pinaagi sa pagtinabangay alang sa usa ka katuyuan.
Sa mensahe ni Gobernador Aumentado, gihulagway niini nga ang maong hospital katumanan sa dugay nang damgo sa mga Bol-anon nga serbisyong panlawas diin kalidad ug sayon makab-ot bisan sa yanong mga indibidwal.
“A dream of a better future through accessible and high-quality healthcare is now taking shape with the partial operationalization of this state-of-the-art facility,’ matud sa Gobernador.
“This center stands as a symbol of the government’s investment in quality medical services and its continued commitment to expanding access to affordable and specialized care in Bohol and the wider Central Visayas region,” dugang ni Aumentado.
Kahinumduman nga si Sen. Joseph Victor “JV” Ejercito, sa dihang nanilbihan isip senador ug nangulo sa komitiba sa panlawas, mi-sponsor sa Universal Healthcare Law.
Mibisita kini sa Bohol kaniadto aron pagsusi sa maong hospital ug mipadayag sa pasalamat nga ang napagawas nga pondo dul-an duha ka bilyon ka pesos alang sa maong proyekto, dako nga tabang aron ang mga adunay sakit sa kasingkasing nga nagkinahanglan sa espesyalista dili na kinahanglanon mubyahe paingun sa kauluhan kay ang Bohol mahimo nang makapahigayon sa susamang mga serbisyo.
Gitutokan usab ni kanhi Kongresista Edgar Chatto ang pagpatukod sa maong hospital, diin gihulagway kini nga usa ka state-of-the-art nga pasilidad gumikan sa katahom ug pagka-moderno sa mga kahimanan niini.
Pipila sa mitambong sa maong soft opening gawas sa mga mihatag og mensahe, mao sila si Engr. Annette Tan, Health and Services Regulatory Bureau; Central Visayas Regional Director Joshua Brillantes; Dr. Van Philip Baton, Provincial Department of Health-Bohol.
Mitambong usab ang kanhi Kongresista Edgar Chatto uban ni Councilor Pureza Chatto, Bokal Mutya Kismet Tirol; Dr. Miguelito Jayoma, Medical Center Chief I sa Gov. Celestino Gallares Memorial Medical Center; ug Dr. Nelson Elle, Medical Center Chief II sa Don Emilio Valle Memorial Hospital, Ubay.
Anaa usab si Dr. Florge Michael Sy gikan sa TRC-Argao; mga kadagkuan sa Philippine Heart Center; ug Cebu South Medical Center, mga chief of hospital ug officer in charge sa mga hospital nga gipanag-iya sa lalawigan ug ang mga kontraktor. (RTB)
