GIPANGUNAHAN ni Gobernador Erico Aristotle Aumentado ang pagtunol ngadto sa tulo ka asosasyon sa mga mag-uuma ang pondo nga mikantidad og P1,387,171 didto sa opisina niini sa Kapitolyo, Septiyembre 10, 2025
Kini human miagi sa makuti nga pagsubay sa Provincial Cooperative Development Office (PCDO) nga gipanguluhan ni Ma. Conrada Fuentes, ang maong mga kapunungan, kung angayan ba kini nga makadawat sa mga ayuda gikan sa kagamhanang probinsyal.
Mikabat sa P572,171 ang nadawat sa Casilay United Farmers Association (CAUFA), Barangay Casilay, Sierra Bullones, nga gipanguluhan ni Rito Ipanag, diin para kini sa proyekto nga Establishment of Mini Ricemill Facility.
“Dako og ikatabang sa barangay ning galingan nga among gipangayo sa PCDO kay kinahanglanon gyod ang galingan sa amoang dapit,” matud ni Rito.
Samtang si Cirila Balaba, tresurera sa CAUFA, nagkanayon nga unang higayon nga nangayo sila og tabang sa gobyerno ug dakong kalipay sa mga membro sa kapunungan nga wala mapakyas ang ilang pagpangayo og tabang.
Ang Tanod Water-User’s Association (TAWAS) sa Barangay Tanod, Anda nagkantidad og P500,000 ang nadawat alang sa ilang proyekto nga Construction of Reservoir diin gidawat kini sa presidente nga si Alejandro Cajandab.
Samtang mikabat og P315,000 ang nadawat sa Poblacion Organization Farmer’s Agriculture Cooperative (POFAC) sa Poblacion Trinidad ang ilang nadawat para sa proyekto nga Acquisition of Fertilizers and other inputs for Production, diin gidawat kini sa presidente nga si Rogaciano Lumacad.
Matud ni Gobernador Aumentado nga tungod kay napilian mn sila sa PCDO nga tabangan, hinaot nga ang pagsalig ilang ampingan ug ang pondo ilang palambuon.
“Ubanan unta sa Labaw’ng Makagagahom ang inyong paningkamot kay excited kita nga masayod sa inyong success stories,”pagdugang ni Aumentado.
Matud pa nga sa diha nga ikapanugilon sa uban nga ang kagamhanang probinsyal misuporta sa panginahanglanon sa mga mag-uuma, masayran sa daghan nga ang gobyerno sa kanunay anaa aron sa pagtabang sa paglambo sa komunidad.
Ang maong mga inisyatibo kabahin sa tumong sa administrasyon ni Aumentado nga kahatagan sa dugang interventions ug suporta ang mga asosayon ug kooperatiba sa kabarangayan aron makabaton kini sa kapanginabuhian.
Kahinumduman nga ang Philippine Statistics Authority (PSA) mipagawas sa pahibalo sa unang 24 ka mga lungsod nga taas ang poverty incidence subay sa survey tuig 2023.
Kini bisan pa man nga mauswagon ang kinatibuk-ang munisipalidad, apan nasayran nga daghan usab ang nagkalisod sa pipila ka mga dapit sa lalawigan. (RTB)
