NAKABENEPISYO ang katorse ka mga barangay sa P3,750,000.00 nga ayudang pinansyal gikan sa Kapitolyo atol sa gipahigayon nga Duaw ug Kukabildo ni Gobernador Erico Aristotle Aumentado ngadto sa Barangay Canduao Occidental, Magsaysay, Nailo, Ginopolan ug Marawis, Lungsod sa Valencia kagahapong adlawa Septyembre 10.
“Limpyong pang-gobyerno, tinud-anay nga serbisyo, mao ang atong gi-paabot, gipalanog sa tibuok probinsya sa Bohol,” pasiuna nga mensahe sa gobernador ngadto sa katawhan sa barangay Canduao Occidental, Valencia atol sa gipahigayon nga turnover ceremony sa ayuda alang sa duha ka barangay.
Tumong ni Aumentado nga sa Strategic Change Agenda sa administrasyon ngadto sa inclusive governance, limpyong pang-gobyerno ug tinud-anay nga serbisyo, masiguro niini nga makaabot ang serbisyo ug mga kaayuhan gikan sa Kagamhanang Probinsyal ngadto sa tanan, ug sa mga suok nga dapit sa 1,109 ka barangay sa lalawigan.
Matud pa nga paagi usab kini sa gobernador nga mas mapasayon sa mga barangay sa kabukiran ug kaislahan pagbenepisyo sa suporta, gumikan gihatod mismo sa ilang mga tugkaran ang ayuda sa Pangagamhanan.
Pinaagi sa Duaw ug Kukabildo, nasayran usab sa gobernador ang aktwal nga kahimtang sa mga konstituwente ug personal niini nga nahinabi ang mga opisyales ug ang nagkalain-laing sektor sa katilingban alang sa mas epektibo nga paglatag og mga plano sa mga programa ug proyekto.
Kahinumduman nga mas gipasakaan ning maong administrasyon ang ayuda sa kabarangayan matag tuig ngadto sa labing minus P200,000 matag barangay ug labing minus P5 milyones matag lungsod diin mikantidad kini og P241,800,000 aron nga mas mapalapdan usab sa mga LGUs ang pagpatuman sa ilang prayoridad nga proyekto.
Gipahinumduman sa gobernador ang mga opisyales sa barangay sa responsibilidad niini nga ayuhon paggamit ang kwarta sa gobyerno, idapat kini sa sakto nga proyekto nga naaprobahan ug i-liquidate kini dayon human sa pag-implementar sa proyekto.
“Gusto nako nga ma-empower ang barangay ug kami mismo gusto namo nga mahibaw mi og kinsang barangay ang kasaligan kay kung naa mi ihatag nga isalig ang pondo gikan sa Provincial Government di maliquidate pasabot there’s something wrong sa barangay. Kung ang barangay kasaligan, ang kadagkuan sigurado ko magdalidali na pod na og liquidate kay maghunahuna kung unsa na pod ang i-proyekto,” pagdugang ni Aumentado.
Susama usab niini ang quarry operations diin kaniadto matud pa, ginagmay ang nadawat nga pahat sa mga hingtungdan.
Apan lig-on ang political will ni Gobernador Aumentado ug makusganong gi-implementar niini ang balaod sa koleksyon bahin sa quarry, hinungdan nga ang local government units sa kalungsuran ug kabarangayan dinagko na ang nadawat nga pahat gikan sa buhis sa sand and gravel ug uban pang koleksyon mahitungod sa quarrying operations.
Sa nakalabay nga 28th Inagauration Ceremonies, June 30, 2025, taho sa gobernador sa mensahe niini nga mikabat na sa P48,847,851.40 ang kita sa buhis sa quarry.
Dakong kalainan kini sa koleksyon kaniadto sa buhis sa quarry nga P4-M tuig 2019, P13-M tuig 2020 ug P8-M tuig 2021.
Gipadayag sa mga kapitanes ug uban pang mga opisyales ang ilang bug-os nga suporta kang Gobernador Aumentado ug sa tibuok administrasyon.
Samtang sa laing bahin, si Bise Gobernador Nicanor Besas kinsa katimbang sa gobernador pagpatuman sa iyang mga plataporma, mipasalamat usab sa mga Valenciahanon sa gipadayag nga suporta kaniya sa nakalabay nga piniliay diin kini naghatag og kahigayon kang Besas alang sa pagserbisyo sa mga Bol-anon.
Gawas kang Besas, kuyog usab sa gobernador sa Duaw ug Kukabildo sila si Bokal Nathaniel Binlod ug Greg Jala, Mayor Dionisio Neil Balite ug Vice Mayor Aristotle Cometa.
Ang mga barangay nga gibisita ni Aumentado sa Valencia mao ang Barangay Canduao Occidental, Adlawan, Magsaysay, Taytay, Pangi-an, Nailo, Buyog, Ticum, Cansibao, Ginopolan, Banderahan, Tausi-on, Marawis, ug Omjon. (RTB)
