GITUKI ang polisiya sa turismo sa lalawigan atol sa ika-30 nga sesyon sa Sangguniang Panlalawigan (SP) sa Bohol.
Atol sa regular session niini niadtong Martes, Septiyembre 9, si Board Member Jamie Aumentado Villamor miduso sa pagpalabang sa Bohol Sustainable Tourism Development Code, sa unang pagbasa.
Matod ni Villamor, ang maong lakang mahimong produkto sa kolaborasyon tali sa publiko ug pribadong sektor, ingon man sa mga stakeholders, nga adunay mga polisiya nga nagpakita sa presente nga mga kamatuoran, emerging trends, ug usa ka dinalian nga panawagan alang sa sustainability, inclusivity, ug resilience sa industriya sa turismo.
Ang mga probisyon niini, matud niya, maglakip sa Tourism Destination Management, Tourism Product Development, Boholano Brand of Tourism, Infrastructure Support, Marine and Water Tourism, Wildlife Interaction, ug Protected Areas Management.
Ang pag-usab sa kodigo sa turismo uban ang pagkamalahutayon isip usa ka angkla nagsaad nga mas mosanong sa panahon ug nagpakita sa tatak sa turismo sa Bohol. Magkinahanglan kini isip usa ka bililhong reperensiya sa kasamtangang draft nga kodigo sa turismo sa paghulma sa mga direksyon sa kalamboan sa probinsiya.
“It seeks to balance growth with preservation, progress with protection. As well as sustainability of the people’s lives. This representation submits that tourism in Bohol is not just about attracting visitors to our tourism sites, it is about ensuring that the people who have lived in these communities for generations are also uplifted by the opportunities that tourism brings,” si Villamor miingon.
Usa ka Technical Working Group ang maporma para sa pagporma, pagrepaso, ug pagpauswag sa gisugyot nga blueprint ug bibliya sa turismo para sa probinsiya.
Maglangkob kini sa mga representante sa kagamhanang probinsiyal, partikular na sa Gobernador’s Office, SP Committee on Tourism, Bohol Provincial Tourism Office, Bohol Provincial Environment and Management Office, uban sa mga private sector partners sama sa Bohol Association of Hotels, Resorts, and Restaurants, mga hingtungdang national line agencies, ug ubang stakeholders.
Nahiuyon sa agenda sa balanse nga pagtubo ug pagpreserba, giaprobahan usab sa SP sa unang pagbasa ang usa ka gisugyot nga ordinansa ni Climate Change Committee Chair Dionisio Joseph Balite, bahin sa pagtukod sa Laudato Si Tree Parks sa matag lungsod sa probinsiya.
Gigiyahan sa ikaduhang encyclical ni anhing Pope Francis, ang gisugyot nga ordinansa nagpasiugda sa pagpadayon ug hustisya sa ekolohiya ug nagtinguha nga matubag ang nagkagrabe nga epekto sa pagbag-o sa klima, pagkadaot sa kinaiyahan, ug pagkawala sa biodiversity.
Giduso pa ni Balite ang pag-aprobar sa mga resolusyon nga nagsagop sa contingency plans sa Provincial Disaster Risk Reduction and Management Council (PDRRMC) sa nag-unang lima ka mga peligro, sama sa tropical cyclone, pagbaha, pagdahili sa yuta nga dala sa ulan, rain-bearing weather system, ug linog, ingon man pagtukod sa response cluster sa PDRRMC.
Sa susamang kalambuan, giaprobahan sa SP sa unang pagbasa ang institusyonalisasyon sa programang Kadiwa ng Pangulo.
Gipasiugda ni BM Lucille Lagunay ang kamahinungdanon sa pagpausbaw sa ekonomikanhong kalamboan ug seguridad sa pagkaon, mga katuyuan nga gitumong sa programa pinaagi sa malahutayong panag-uban ug mga kalambigitan nga nagdala sa inclusive growth.
Si Lagunay, kinsa nangulo usab sa committee on cooperatives, miduso usab sa accreditation sa Bohol Association of Non-Government Organizations, Bohol Diocesan Multi-Purpose Cooperative (MPC), Aguipo Coconut Farmers MPC, Bilar Water and Sanitation MPC, ug ang Lungsoranon Performing Arts Ensemble.
Samtang, sa pagtubag sa dinalian nga mga kabalaka, daghang mga miyembro ang nagbukas sa hinungdanon nga mga diskusyon sa ilang tagsatagsa nga mga komite.
Gipasiugda ni BM Mutya Kismet Tirol ang dignidad sa tawo, pagkadinalian, ingon man ang pinakamaayo nga pag-atiman isip mga prayoridad. Giduso niya ang mga reporma sa sistema sa kahimsog nga nagtubag sa panginahanglan alang sa pag-upgrade sa mga protocol ug kapasidad; kakulang sa mga tambal, suplay, ekipo, laboratory reagents, ug paglangan sa pagpalit.
Si BM Romulo Cepedoza nisugyot og ordinansa sa higpit nga pagpatuman sa balaod sa sabong, pagpatunhay sa tradisyonal nga porma sa sabong aron mapanalipdan ang mga lungsoranon gikan sa gubot nga “modernized” nga sistema sa pagpusta ug pagpalig-on sa gahom sa kapulisan sa LGUs.
Si BM Joahna Cabalit-Initay nanawagan usab sa pagbantay ug pagsusi sa mga trabaho ug proyekto sa publiko. Sa pagkutlo sa mga kontrobersiya sa korapsyon ug sa daw walay pagpakabana sa mga Boholano sa kasamtangang nasudnong isyu, iyang gitinguha ang transparency, efficiency, ug accountability sa gobyerno.
“Maghiusa kita sa tibuok nasod, magsubo sa kasakit sa pagkawala sa binilyon ka pesos sa korapsyon,” matod ni Initay, nga gitumong ang maong butang ngadto sa komite sa mga buluhaton sa publiko alang sa imbentaryo ug pagmonitor sa mga proyekto sa imprastraktura,’ sigon sa PCL President.
Si Initay, isip ex-officio board member ug PCL president, karon nangulo sa Committee on Review of Municipal Ordinances and Relevant Issuances, uban ni BM Benjie Arcamo isip vice chair ug BM Tirol isip miyembro.
Ang sesyon nga gipangulohan ni VG Nick Besas, mi-aprobar usab sa usufruct agreement tali sa provincial government ug sa National Irrigation Administration alang sa lugway sa paggamit sa ilang opisina sulod sa 15 ka tuig. Ang rekomendasyon sa komite gi-report ni BM Greg Jala.
Giaprobahan usab sa ikatulo ug kataposang pagbasa ang ordinansa nga gi-author ug gipasiugdahan ni BM Nathaniel Binlod bahin sa pagsuspenso sa pagpahamtang ug pagpangolekta sa mga bayronon ug buhis kalabot sa transportasyon sa mga butang ug produkto.
Usa ka ordinansa sa pag-amendar sa mga probisyon sa ordinansa sa pagmina gi-calendaryo usab alang sa ikaduhang pagbasa sa sunod nga sesyon. (RTB)
