GIPADAYAG ni Gobernador Erico Aristotle Aumentado ang dakong kalipay sa naangkon nga mga Gold Awards sa Koro Seraphim, gikan sa sunod-sunod nga kompetisyon nga gipahigayon sa internasyonal ug lokal nga entablado.
Kini atol sa pagbisita sa mga membro sa Koro Seraphim ngadto sa gobernador, uban kang Provincial Administrator Asteria Caberte, Septiyembre 1 didto sa Kapitolyo, Dakbayan sa Tagbilaran.
Gikahinabi sa gobernador ug sa provincial administrator sila si John Jescio Liquit, Presidente sa Koro Seraphim uban kanila ni Mari Aleli Antoni-Inting, conductor; Loreth Kean Payot; Shem Mathew Candog; Tresha Gift Pamisa; Christine Lev Vallecera; Florie Anne Caballo; Franscis Ann Sarte; Frank Jay Rodriguez; Ronel James Primacio; ug Jocil Cris Inting.
Gipadangat sa duruha ang pahalipay ngadto sa Koro Seraphim sa talagsaong pagpasundayag ngadto sa Taipei International Choral Competition niadtong Hulyo 30 ning maong tuig, diin sa 35 ka mga partisipante, nakuha sa Koro Seraphim ang Gold Award sa Mixed Choir ug Musica Sacra categories.
Niadtong Agosto 20-24, ang Koro Seraphim nisalmot sa Andrea O. Veneracion International Choral Festival (AIOVICF) didto sa Ateneo De Manila University ug nakakuha na usab kini sa Gold Awards for Musica Sacra ug Mixed Choir categories.
Nakakuha usab kini sa second prize sa susamang kompetisyon uban ang Best Performance of Contest Piece nga “Umay Gu-lai” diin usa kini ka komposisyon ni Ryan Cayabyab.
“Ang inyong talento ug gugma sa atong lalawigan, kultura, ug kasaysayan testamento sa atong pagka-abunda sa talagsaong bahandi isip usa ka UNESCO Global Geopark,” pamahayag ni Aumentado sa iyang facebook page atol sa courtesy visit nga gipahigayon sa maong inila nga Choral Group sa Bohol.
Ang kalampusan sa Koro Seraphim dakong kontribusyon ning maong mga kabatan-onan ngadto sa strategic change agenda sa administrasyon pagpalig-on ug pagpatunhay sa usa ka cultural heritage o kabilin ngadto sa sunod nga henerasyon.
Talagsaon ang pagpasundayag sa Koro Seraphim sa ilang katakos ug talento sa natad sa musika ug pag-arte.
Ang Koro Seraphim usa ka choral group nga gisalmutan sa mga talentadong kabatan-onan sa Bohol diin naila kini sa ilang pinasahe nga rendisyon sulod na sa 10 ka tuig. Sa Nobyembre 23 mao ang ika-11 ka tuig sa maong choral group. (RTB)
