NIABOT na ngadto sa 188 ka kaso sa leptospirosis sa Central Visayas ang natala sa Department of Health gikan sa buwan sa Enero hangtud sa Agosto 23, 2025 diin 20 ang nakalas.
Ang maong gidaghanon sa kaso nisaka kini og 68 porsyento diin sa susamang mga buwan sa nilabay’ng tuig aduna lang kini 112 ka kaso ug 10 ang nakalas.
Gipanglantawan sa DOH-7 nga mosaka pa ang kaso sa leptospirosis karong buwana tungod sa nasinating pag ulan-ulan.
Gikataho nga 77 porsyento sa mga nataptan ang na-admit sa tambalanan. Giklaro sa DOH nga normal pa ang utilization rate sa mga tambalan.
Base sa talaan sa DOH kasagaran sa mga nataptan sa leptospirosis ang mga mag-uuma nga nagtikad sa ilang basakan, estudyante, mga inahan, mga tighatud sa mga anak sa eskwelahan ug ubang mga tawo nga niubog sa baha.
Lakip sa top 5 nga adunay daghang kaso sa leptospirosis ang Dakbayan sa Sugbo, gisundan sa Probinsiya sa Sugbo, Bohol, Dakbayan sa Mandaue ug Dakbayan sa Lapu-Lapu.
Apan ang DOH wala mohatag og datos sa gidaghanon sa nataptan niining mga dapita gumikan kay ang mga LGU lang ang mopagawas sa kasayoran.
Gikabalak-an sa DOH nga mosaka pa ang kaso sa leptospirosis karong buwana tungod sa padayon nga nasinati nga pag-uwan nga moresulta sa pagbaha nga masagolan sa ihi sa ilaga.
Giingong usa sa nakatampo sa pagsaka sa maong sakit ang baha niadtong buwan sa Hulyo ug Agosto niining tuiga.
Si Dr. Eugenia Mercedes Cañal, pangulo sa Regional Epidemiology and Surveillance Unit (RESU)-7 nagkanayon nga gawas sa ilaga mamahimo usab nga magdala sa leptospirosis ang mga iro, iring, ug ubang hayop nga nataptan sa maong sakit.
Ang DOH niawhag nga moduol dayon sa mga health center kon adunay gipamati sa lawas aron matabang dayon nga dili na mosangpot pa sa grabeng sitwasyon. (RTB)
