NAGPAHIGAYON og usa ka meeting ang kagamhanang probinsyal pinanguluhan ni Gobernador Erico Aristotle Aumentado ug ang nasudnong opisyales pinanguluhan ni Usec. Jerome Oliveros, Department of Agriculture (DA) Undersecretary for Special Concerns, niadtong Agosto 13, didto sa Candijay Municipal Hall, diin gitumbok niini ang prayoridad nga mga programa pagpalig-on sa agrikultura.
Gilatag usab ang mga solusyon sa nakita nga mga kal-ang, aron mas paspas ang implementasyon sa mga programa ug proyekto.
Ang direksyon sa kasamtangang administrasyon sa Bohol nagtumong nga mas pakusgan ang Bohol Dairy Development Program (Gatas Bol’anon Program), ug i-posisyon ang lalawigan isip usa ka umaabot nga Dairy Capital of the Visayas.
Gidayeg ang business model sa Bohol Dairy Development Program sa pagpahiluna sa Office of the Provincial Veterinarian (OPV) ubos sa liderato ni Gobernador Aumentado.
Dako ang kumpyansa sa mga opisyales, nga kaya sa maong sektor nga mas palambuon ang dairy industry sa lalawigan.
Ang National Dairy Authority (NDA), adunay ginatukod nga lima ka stock farm sa nagkalain-laing dapit sa nasud, diin matag stock farm kun livestock farm, pagabutangan og labing minus 150 ka imported nga baka.
Ang lungsod sa Ubay usa sa mga recipient sa stock farm ug nahimutang kini sa 600 ka ektarya nga farmland.
Kung maanad na ang maong mga baka sa klima sa Ubay, ipangbalhin kini sa multiplier farm aron pasanayon ug itugyan ang mga baka ngadto sa mga manggagatas aron ang maong mga baka mamahimong tinubdan sa mas lapad nga produksyon sa gatas.
Ang mga manggagatas nahisakop og mga kooperatiba diin ang Bohol Dairy Cooperative (BODACO), mao ang consolidator sa tanang makolekta nga gatas alang sa saktong pagproseso niini.
Alang sa kalidad ug seguridad sa produkto ang NDA, adunay gihatag nga rekisito diin gikinahanglan nga ang mga manggagatas nga sakop og kooperatiba magbaton sa License to Operate (LTO).
Nakita sa maong meeting nga dili sayon alang sa mga yanong mag-uuma o manggagatas, ug sa kooperatiba ang pagkuha og LTO.
Kini ang hinungdan nga giduso sa gobernador ang pagsulod sa Provincial Cooperative Development Office (PCDO) sa maong industriya aron maayudahan ang mga manggagatas sa proseso ug kinahanglanong mga dokomento.
Subay sa maong tingusbahan, giduso sa gobernador nga kinahanglanon ang usa ka Memorandum of Agreement (MOA) tali sa nasudnong pangagamhanan sa ilang paglatag sa programa ug ayuda uban sa kagamhanang probinsyal nga maoy mudumala sa proyekto alang sa usa ka epektibo nga partnershipnug sa NDA.
Gipahigayon usab ang inisyal nga plano alang sa usa ka Agricultural Summit alang sa tanang mga lambigit sa dairy industry.
Sa laing bahin, ang Bureau of Fisheries and Aquatic Resources (BFAR) Region VII giimbitahan sa Kapitolyo sa usa ka meeting sa sunod semana alang sa mga lakang nga pagahimuon pagpauswag sa produksyon sa isda ug ang paglatag og mga pamaagi pag-angkon og cold storage alang sa mga isda.
Gipresentar usab sa Office of the Provincial Agriculturist (OPA) ang mga proposals sa mga proyekto sama sa pag-establisar sa Dimiao og Tropical Fruit Scion Grove and Nursery sa 30 ka ektarya nga farmland, ug Provincial Coconut Seed Garden and Nursery sa 20 ka ektarya nga yuta sa mao gihapong lungsod.
Apil niini ang pagsiguro nga hingpit nang makabaton sa intellectual property rights ang produktong Ubi Kinampay sa Bohol sama sa Geographical Indication (GI).
Apil usab sa diskusyon ang pagpalig-on sa seaweed production sa Bohol.
Gawas ni Aumentado ug Oliveros, mitambong sa maong meeting si DA Asec Benjamin Albarece, NDA National Administrator Marcus Antonius Andaya, DepEd Usec Trygve Olaivar, Candijay Mayor Thamar Olaivar, BFAR 7 Regional Director Mario Ruinata, ug DA RTD for Operations Cirilo Namoc.
Lakip usab nila ni Provincial Administrator Asteria Caberte, Board Member Lucille Lagunay, OPV head Meydallyn Paman ug mga empleyado, OPA head Liza Quirog ug mga empleyado, PCC -Ubay Center Director Ma. Dinah Loculan, ug Elma Abay-abay PCC Ubay ug PCA Provincial Manager Jovencio Felisilda. (RTB)
