NAKADAWAT ang pito ka mga asosasyon sa High Density Polyethylene (HDPE) alang sa fish cages sa proyekto nga Tilapia Growers in Inland Aquaculture, didto sa Bayongan Dam, San Miguel, Agosto 20.
Ang programa, nga giimplementar pinaagi sa Office of the Provincial Agriculturist (OPA) nga gidumala ni Liza Quirog, nagkantidad og P6.3 million.
Nagkantidad nga P900,000 ang nadawat nga HDPE matag asosasyon.
Gipanguluhan ni Gobernador Erico Aristotle Aumentado ang ceremonial turn over niini uban ni Provincial Administrator Asteria Caberte, hepe sa OPA Liza Quirog uban ni Mary Queen Atup, Bureau of Fisheries and Aquatic Resources (BFAR), Board Member Nathaniel Binlod, National Irrigation Administration (NIA) pinaagi ni Evelina Putong, Sevilla Vice Mayor Juliet Dano, San Miguel Vice Mayor June Reign Reyes, ug uban pang stakeholders.
Gidawat kini sa Ilaya Tilapia Growers Assn. sa San Roque, Talibon; Awjan, Zamora Farmers Assn. sa Talibon; Guinob-an Tilapia Growers Assn. sa Sevilla; Brgy. Farmers Technician Assn. sa Pilar; Valladolid Palayaman Farmers Assn. sa Loboc; San Miguel Tilapia Growers Assn. sa San Miguel; ug Loay Fishermen’s Assn. sa Loay.
Mapasalamaton ang mga fisherfolks sa ayuda nga ilang nadawat gikan sa Kapitolyo diin matud pa maayo kini nga paagi pag-establisar sa food security ug dako kini nga tabang sa pag-alibyo sa mga membro nga gakalisod sa panginabuhi.
Samtang sa laing bahin ang BFAR naghatag og 15,000 ka tilapia fingerlings nga maoy gigamit sa ceremonial stocking didto sa fish cage nga anaa mahimutang sa Bayongan Dam nga gipanag-iya sa San Miguel Tilapia Growers Association.
Si Mary Queen Atup sa OPA Fisheries Division miingun nga human sa tulo o upat ka buwan sukad sa stocking o pagbutang sa fingerlings ngadto sa fish cage mahimo na kini nga ma-harvest.
Pagpasabot sa BFAR nga kung maayo ang dagan sa operasyon sa fish cage, makapahigayon kini og tulo ka cropping.
Nasayran nga sa usa ka tuig, mahimo nga mukita ang fish cage, nga adunay 15,000 ka fingerlings, og kapin P1.2 milyon. Kini gibase sa 80 porsyento nga survival rate og sa farm gate price sa tilapia nga P120 matag kilo.
Si PA Caberte namahayag nga ang proyekto pagpalapad sa produksyon sa tilapia, usa ka stratehiya sa value chain ug inclusive growth.
Ang fingerlings nga gamiton sa mga asosasyon magagikan sa nagkalainlaing providers sama sa OPA, BFAR, private providers ug stakeholders.
Sa dihang ma-harvest na kini, ibaligya ang maong mga tilapia sa barato nga presyo sa kamerkaduhan isip alternatibong isda batok sa mahalon nga mga isda. Ang mga carenderia o restaurants mupalit niini aron ikapamaligya na usab ngadto sa publiko.
Ang Strategic Change Agenda sa Pangagamhanan nagtumong ngadto sa usa ka inclusive, climate-smart agriculture and fisheries diin gipadangat sa administrasyon ang intervention pagsuporta sa mga fisherfolks sa ilang panginabuhi, pagtubag sa problema sa mahal nga presyo sa isda, ug pagpalig-on sa giimplementar nga value chain strategy.
Mapasalamton ang gobernador ngadto sa NIA pagsuporta sa proyekto, ug paghatag og higayon nga makagamit sa tubig, ug giawhag ang mga membro sa asosasyon sa pagtinabangay nga panalipdan ang Bayongan Dam.
“Kitang tanan magtinabangay ta labi na ang mga tilapia growers nga unta pod inyong i-consider nga kamo man mugamit sa tubig sa daily use, angay ibalanse ug magtinabangay ta,” matud ni Aumentado. (RTB)
