GIKONPIRMAR ni Joahna Cabalit-Initay, konsehal na karon sa Cortes nga molansar siya pagka PCL President sa umaabot eleksyon niini.
Nilansar na kaniadto si Cabalit-Initay pagka kongresista ug bokal sa Distrito Uno.
Apil si Cabalit-Initay sa mga nilutaw nga mga posibleng moatbang kang Konsehal Gloria Biwang Gementiza sa San Isidro pagka presidente sa tanang konsehal sa Bohol.
Nilingkod na kaniadto si Biwang-Gementiza pagka PCL President human iyang gipilde si Antequera Councilor Cecilia Rebosura-Salomon samtang ang ikaduhang higayon isip PCL President mao ang pagpilde niya kang Loay Councilor Jescelo Adiong.
Sa maong piniliay, dunay term sharing agreement sila Biwang-Gementiza ug Nic Besas nga maoy Bise Gobernador na karon.
Ang uban nga nilutaw nga mga pangalan mao si kanhi Mayor sa Balilihan ug karon Konsehal Pureza Veloso-Chatto, kanhi Dimiao Vice Mayor ug karon Konsehal Dr. Jessie T. Paluga.
Una nang namahayag si Gob. Aris Aumentado nga si Biwang-Gementiza ang iyang kandidato pagka PCL President, Carmen Mayor Che Toribio Delos Reyes pagka LMP President ug Baclayon Vice Mayor Atty. Jodel Theodore Cabahug isip presidente sa Vice Mayors League of the Philippines -Bohol. (Kahlil Lester O. Camba)
