SA iyang ikaduhang episcopal appointment sa Pilipinas, si Pope Leo XIV niadtong Miyerkules, Hulyo 16, 2025 mitudlo kang Bishop Alberto Uy sa Tagbilaran isip bag-ong arsobispo sa Sugbo.
Si Uy maoy mopuli kang Arsobispo Jose Palma, kansang resignasyon gidawat sa papa.
Nag-edad si Palma og 75 niadtong Marso 19, ang edad nga gikinahanglan sa mga obispo sa pagsumite sa ilang resignation. Nagserbisyo siya isip arsobispo sa Sugbo sulod sa mga 14 ka tuig.
Sa edad nga 58, si Uy nahimong ikalima nga arsobispo sa Sugbo.
Natawo sa Ubay, Bohol, nagtuon siya og pilosopiya sa Immaculate Heart of Mary Seminary sa Tagbilaran City ug theology sa St. John Mary Vianney Theological Seminary sa Cagayan de Oro City, diin nakakuha siya og master’s degree sa pastoral ministry.
Naordinahan nga pari para sa Diocese of Talibon kaniadtong 1993, adunay daghang mga tahas sa diyosesis. Naghupot usab siya og lisensya sa sagradong teolohiya gikan sa Loyola School of Theology sa Quezon City.
Gikan sa 2002 hangtod 2006, si Uy nagtuon sa Pontifical Gregorian University sa Roma, nga nakakuha og doctorate sa sagradong teolohiya.
Gitudlo ni Pope Francis si Uy nga obispo sa Tagbilaran niadtong Oktubre 2016. Pormal siyang milingkod sa pagkapangulo sa diyosesis niadtong Enero 6, 2017, usa ka adlaw human sa iyang ordinasyon sa pagka-obispo.
Ang Sugbo, naila nga “Duyanan sa Kristiyanismo sa Pilipinas,” maoy pinuy-anan sa mga 4.7 milyones ka Katoliko sa kapin sa 170 ka parokya.
Sa 2023, ang artsidyosesis gialagaran sa 375 ka klero sa diyosesis ug 278 ka relihiyosong mga pari. (RTB)
