GIBATI og mainitong pagdawat sa Bureau of Fire Protection (BFP) Central Visayas ang ilang bag-ong regional director nga si Fire Chief Superintendent Fred Trajeras Jr., nga mipuli kang Fire Chief Superintendent Roy Roderick Aguto atol sa Change of Command Ceremony nga gipahigayon sa BFP National Headquarters, Quezon City kaniadtong Hunyo 19, 2025.
Dinhe sa Bohol, mainitong sab gidawat si Dir. Trajeras sa Bureau of Fire Protection (BFP) Bohol gipangulohan ni Fire Superintendent Raul Bustalino, Provincial Fire Marshal, nga maoy ang ilang bag-ong Regional Director.
Si Dir. Trajeras Jr. nakatakdang magpahigayon og command visit sa mga buhatan sa BFP sa probinsya sa Bohol aron makigpulong sa iyang mga sakop ug personal nga masusi ang kahimtang sa ilang operasyon.
Lakip sa iyang mga kalihokan mao ang pagtambong isip guest of honor sa umaabot nga blessing ug inauguration sa bag-ong natukod nga ₱30 milyones nga Bohol Provincial Fire Marshal’s Office sa Malayo Sur, Cortes karong buwan sa Hulyo.
Gilauman usab nga mopangulo si Dir. Trajeras sa pagbukas ug pagbendisyon sa duha pa ka bag-ong estasyon sa bombero sa probinsya nga mao ang Trinidad Fire Station ug ang Mabini Fire Station nga usa ka dakong kalampusan sa pagpalig-on sa serbisyo sa kabombero sa mga lungsod.
Ang pag-abot ni Dir. Trajeras Jr. gilauman nga maghatag og bag-ong kadasig ug padayon nga reporma sa serbisyo sa BFP sa rehiyon, ilabi na sa lalawigan sa Bohol. (RTB)
