MIBALHIN na ang Bureau of Fire Protection (BFP) Provincial Office sa Bohol nga gikan sa ilang temporaryong opisina nga nahimutang sa karaang Tagbilaran City Airport, ngadto sa ilang bag-ong natukod nga opisina sa Malayo Sur, Cortes.
Sumala ni BFP Bohol Provincial Fire Marshall FSupt. Raul Bustalino nga ang ilang unang flag raising ceremony sa bag-ong buhatan gihimo niadtong Lunes, Hunyo 16, 2025.
Ang maong building nga nagkantidad og P30 milyon, gitukod sa lote nga 2,000 sq. meters nga gipanag-iya sa Probinsya sa Bohol nga gipaubos sa deed of usufruct agreement sulod sa 40 ka tuig ngadto sa BFP.
Giklaro usab ni Bustalino nga ilang gibiyaan ang temporarayo nga provincial office nga mao ang Temporary Treatment and Monitoring Facility (TTMF) nahimutang sa old airport tungod kay gamiton kini sa Provincial Government isip isolation area alang sa mga pasyenteng posibleng adunay Monkeypox.
Gikatakda usab nga pormal nga inagurahan ug blessing-ngan karong Hulyo ang bag-ong opisina nga maoy pinaka-una dinhe sa Central Visayas.
Gitinguhang dapiton sa BFP Bohol sa seremonya ang bag-ong Regional Director sa BFP Region 7 ug si Gobernador Aris Aumentado.
Ang pagtukod sa maong pasilidad gilauman nga magpalig-on sa serbisyo sa kabomberohan sa tibuok probinsya, ilabi na sa pagdali sa pagresponde sa emerhensya ug kalayo. (RTB)
