NADAKPAN sa Tagbilaran City Police Station pinangulohan ni PLt. Col. John Kareen Escober, chief of police ang tulo ka Most Wanted Persons, lakip ang Top 1 sa lalawigan ug duha ka Top 8 sa regional level sa managlahing lugar niadtong Hunyo 17, 2025.
Nadakpan sa Brgy. Poblacion 3, Tagbilaran City ang akusado nga Oliver Ayenza, 36 anyos, ulitawo, drayber, ug molupyo sa Purok 6, Barangay Panaytayon, Tubigon, Bohol.
Si Ayenza mao ang gi-ilang Top 1 Most Wanted sa Provincial Level ug gidakop pinasikad sa warrant of arrest tungod sa paglapas sa Republic Act 9262 o ang “Anti-Violence Against Women and Their Children Act of 2004.” Ang warrant giluwatan ni Hon. Samson Ariel Chiang Cayetuna, Acting Presiding Judge sa RTC Branch 3, Tagbilaran, niadtong Hunyo 13, 2025, nga adunay rekomendadong piyansa nga Php 72,000.00.
TOP 8 MOST WANTED
Nadakpan sa Tagbilaran City Police Station sa laing coordinated operation, ang akusado nga si Orville Urgello, 67 anyos, kasado, walay trabaho, ug residente sa Purok 6, Poblacion, Manticao, Misamis didto sa Barangay Macabalan, Cagayan de Oro City nga gi-ilang Top 8 Most Wanted Person sa Regional Level.
Gidakop si Urgello base sa warrant of arrest nga giluwatan ni Judge Leo Moises Lison sa RTC Branch 3, Tagbilaran, niadtong Disyembre 11, 2023, alang sa kaso nga: Rape ilawom sa Article 266-A sa Revised Penal Code – walay girekomendang piyansa, Lascivious Conduct ilawom sa Section 5(B) sa R.A. 7610 – nga adunay rekomendadong piyansa nga Php 200,000.00.
Nasikop sab sa Tagbilaran City Police Station didto sa Brgy. Poblacion 3, Tagbilaran City si Gabriel Francisco Jr. y Nuñez, 72 anyos, mag-uuma, minyo, ug residente sa Rizal Street, Purok 8, Barangay Cogon.
Si Francisco maoy usa pa sa Top 8 Most Wanted Persons sa Rehiyon 7, nga may kaso sa Lascivious Conduct ilawom sa Section 5(B) sa Republic Act No. 7610.
Ang warrant giluwatan ni Judge Samson Ariel Chiang Cayetuna sa RTC Branch 3, Tagbilaran, niadtong Hunyo 13, 2025, nga adunay piyansa nga Php 200,000.00.
Ang tanang operasyon gipangulohan sa tracker team sa Tagbilaran City Police Station ubos sa pamuno ni PLt. Col. John Kareen Escober, uban ang kauban nga pwersa sa: Bohol CIDG-PFU, RIU 7 – Bohol PIT, Maritime Bohol, 702nd MC-RMFB 7
Sa kaso nga nadakpan si Urgello, giuban sa Tagbilaran City Police Station ang PS5-Puntod CODC-PRO 10, PIU-Bohol PPO, ug Bohol MARPSTA.
Ang tanang nadakpan karon anaa sa kustodiya sa Tagbilaran City PNP samtang nagpaabot sa commitment order aron mabalhin sa Tagbilaran City Jail. (RTB)
