NILUWAT si Governor Erico Aristotle Aumentado og Executive Order No. 28 nga nag-umol na sa ‘Task Force Mpox’.
Kini aron mapalig-on pa ang response efforts ug mamenosan ang pagkatap sa maong makatakod nga sakit.
Apan niklaro usab si Aumentado nga ang lalawigan sa Bohol wala’y natala nga mga kaso sa Mpox apan hugot nga nakig-alayon ang kagamhanan sa maong lalawigan ngadto sa Provincial Health Office kun PHO alang sa pagmonitor sa sitwasyon.
Nagpatawag kini sa emergency meeting karong bag-o sa mga key offices nga adunay kalabutan sa pag-aksyon sa mga napabalita nga kaso sa Monkeypox sa nasod.
“Wala pa kita’y kaso sa maong sakit, apan higpit natong gi-obserbahan ang sitwasyon pinaagi sa atong Provincial Health Office (PHO),” sigon sa gobernador.
Uban sa tigom mao sila si Provincial Administrator Asteria Caberte, Chief of Staff Atty. Filipina Piollo, PLO Atty. Handel Lagunay, PHO OIC Dr. Fruserma Mary Uy, PDRRMO head Anthony Damalerio ug PGSO head Engr. Eustaquio Caliao.
Subay niini, mipahimangno si Aumentado sa publiko nga mag-alerto sa panglawas ug dili una magtapok-tapok kung dili mahinungdanon ang katuyuan, aron kalikayan ang maong sakit.
Dugang sa gobernador nga kinahanglang ipadayon ang naandang pagmintinar sa kahinlo sa palibot ug sa mga panglawas.
Samtang si PA Caberte magpahigayon usab og koordinasyon sa DTI aron mapugngan ang posibleng pagpahimulos sa mga negosyante ning maong sitwasyon.
“Kung adunay membro sa inyong pamilya nga musinati og dili kasagaran nga kahimtang sa panlawas ug adunay pagbutoy-butoy sa panit, konsulta dayon kamo sa atong mga health experts alang sa sayo nga detection,” sigon ni Aumentado.
Gidasig usab amahan sa lalawigan ang tanan nga maghiusa pagpanalipod sa lalawigan batok sa Monkeypox virus kay sayod siya nga kaya kini sa tanan pinaagi sa pagtinabangay. (RTB)
