NA-EMOSYONAL si kanhi Kongresista Arnolfo ‘Arnie’ Teves Jr. dihang nitingog ug namahayag na ang iyang inahan nga si Zenaida atol sa pagpresentar niini sa NBI ngadto sa publiko.
Ang inahan ni Teves nipadayag atol sa press conference ug pagpresentar sa NBI ngadto kang Teves nga labihan siyang nalipay sa mga otoridad sanglit nakita na niya ang iyang anak human sa duha ka tuig nga wala niya kini makita.
Nidugang ang inahan ni Teves nga atol sa ilang unang panagkita sa iyang anak human nabalik na kini sa Pilipinas gikan sa Timor-Leste, wala’y bisan unsang estorya ug igo lang hugot nga gakus ang iyang gisugat.
Ang maong mga pamahayag ni Zenaida nakapatibi sa kanhi Kongresista sa wala pa hingpit natapos ang press conference sa NBI.
Teves Gibalhin na sa Bilibid
GITAKDANG ibalhin sa usa ka detention facility sa NBI sa New Bilibid Prison sa Muntinlupa City si kanhi 3rd District Negros Oriental Congressman Arnolfo ‘Arnie’ Teves Jr.
Gipahibawo ni NBI Director James Santiago nga buntag niadtong biyernes gibalhin si Teves ngadto sa Bilibid.
Si Teves gi-presentar sa NBI ngadto sa mga sakop sa media ug sa publiko pasado alas 10:00 Mayo 30, 2025 sa wala pa kini gibalhin sa Bilibid.
Una nang gitumbok si Teves nga mastermind sa pagpatay kang kanhi Negros Oriental Governor Roel Degamo niadtong tuig 2023. (RTB)
