NIABOT ngadto sa 360 ka tawo ang nadakpan sa tibuok Central Visayas atol sa tulo ka adlaw nga Simultaneous Anti-Criminality Law Enforcement Operations (SACLEO) sa Police Regional Office-7 gikan sa Mayo 26 hangtud sa 28, 2025.
Apil sa major accomplishments ang pagsakmit sa 2,265.93 gramo nga shabu nga nagkantidad og P15.4 milyones atol sa ilang relentless campaign batok sa ilegal nga drugas sa rehiyon.
Ang intensified anti-drug operations nakahimo og 185 successful police operations nga niresulta sa pagkasikop sa 215 ka drug suspects.
Subay sa drug campaign, ang PRO-7 nakapahigayon og 33 ka operations batok sa illegal gambling diin 38 ka indibidwal ang nadakpan ug 66 ka gambling paraphernalia ang nasakmit apil ang P8,000 nga kwarta.
Sa ilang lakang aron mapugngan ang pagkatap sa loose firearms ang PRO-7 nakahimo og 65 ka operasyon diin 15 ka indibidwal ang nadakpan ug 63 ka armas ang gi-surrender ug tulo ka explosives. Tumong sa kampaniya nga mapuhag ang private armed groups ug mapugngan ang gun-related violence sa rehiyon. Samtang ang region-wide manhunt niresulta sa pagdakop sa 95 ka wanted persons.
Ang nahibiling 81 dunay mga outstanding warrants sa nagkalain-laing krimen.
Ang successful law enforcement activities nagpakita sa strategic deployment sa PRO-7 sa intelligence ug operational units subay na sa kolaborasyon sa local communities.
Si Police Brigadier General Redrico Maranan, direktor sa PRO-7 nidayeg sa collective efforts sa mga personnel nga nalambigit sa SACLEO. (RTB)
