ANG Bohol Police Provincial Office (BPPO) ubos sa pamuno ni Provincial Director PCOL Arnel Banzon nagpahibalo nga formal ng gipasaka kaniadtong Mayo 9, 2025, ang kasong kriminal batok sa lima ka mga suspetsadong indibidual nga nalambigit sa insidente nga banggaay sa sakayan nga nahitabo sa sayong kabuntagon sa Mayo 2, 2025, sa kadagatan daplin sa Isla sa Malingin, Bien-Unido, Bohol.
Ang maong insidente miresulta sa kamatayon sa duha ka mananagat. Ang mga biktima, mga residente sa Isla sa Malingin, sakay sa usa ka single-engine nga motorbanca nga color apple green, dihang kini gidunggab sa usa ka triple-engine nga motorbanca nga puwa ug misibat padulong sa lungsod sa Carlos P. Garcia (CPG).
Human sa hugot nga imbestigasyon ug kooperasyon sa Bien-Unido Police Station ug ilang naila ang mga suspetsado nga gituhuang nalambigit sa maong insidente.
Base sa mga ebidensya nga nakuha, gipasaka ang angay nga kaso ngadto sa Bien-Unido Police Station aron mahatagan ug hustisya ang mga biktima ug ilang pamilya.
Si Provincial Director PCOL Banzon mipadayag sa iyang hugot nga suporta sa usa ka patas ug paspas nga imbestigasyon, ug mimando sa tanang buhatan nga molihok dayon ug ipatuman ang tanang legal nga proseso alang sa kalampusan sa kaso.
Si BPPO Spokesperson PLTCOL Norman Lobrigas Nuez mipahibaw nga dili motugot ang Bohol Police nga dili makab ot ang hustisya.
“Among pasalig nga among paningkamotan ang tanang legal nga pamaagi aron mapatuman ang balaod,” matod pa ni PLTCOL Nuez.
Alang sa dugang kasayuran, gidasig sa BPPO ang publiko nga mosunod lamang sa opisyal nga mga pahayag ug ipadayon ang suporta sa kapulisan pinaagi sa paspas nga pagreport sa bisan unsang krimen o insidente. (RTB)
