GATUSAN ka mga sakop sa progresibong grupo ang nipahigayon og lihok protesta subay sa kasaulogan sa Labor Day niadtong Mayo 1, 2025.
Ang grupo nagtapok sa may dalan Osmena Boulevard ning Dakbayan sa Sugbo, ug mipadayag sa ilang panawagan sa gobiyerno.
Hinuon gihulagway sa Cebu City Police Office nga malinawon ang gihimo nga kalihukan sa mga progresibong grupo.
Matud ni Police Lieutenant Colonel Maria Theresa Macatangay, Deputy City Director for Operations ug Tigpamaba sa Cebu City Police Office nga naka-standby ang ilang Civil Disturbance Management(CDM) hinuon walay nitumaw nga kagubot.
Gibana-bana sa kapolisan nga niabot sa 100 ka mga tawo ang nitambong sa kalihukan.
Nihimo sa ilang hiniusa nga programa ang AMA Sugbo-KMU, Bayan Central Visayas uban sa lain-lain nga labor groups ug lakip sa gituki ang kabahin sa umento sa suholan, regularisasyon sa trabaho, katungod nga mag union, kaseguroan sa pagkaon, ug paghagit sa mga magpapiling magbabalaod karong umaabot May 12 nga eleksyon nga dalhon ang labor agenda.
Matud pa ni Jaime Paglinawan, Chairperson sa Bayan Central Visayas, ang ilang demanda atol sa Labor Day 2025 mao ang pagpatuman sa P1,200 nga minimum wage lukop nasud. (RTB)
