GIKAN sa lima, gisaka ngadto sa 15 ka mga dapit sa Central Visayas ang gipaubos sa Yellow Category sa Commission on Elections (Comelec) ning pila ka adlaw na lang mag-election na.
Matod ni Attorney Francisco Pobe, regional director sa Comelec 7 nga sa 15 ka mga lugar nga ipaubos sa Yellow Category nga naglangkob sa tibuok Dakbayan sa Sugbo samtang sa Probinsiya sa Sugbo nga mao ang mga Lungsod sa Daanbantayan, Argao, Balamban, San Fernando, Dalaguete, Dumanjug, Dakbayan sa Mandaue ug sa Lalawigan sa Bohol ang San Miguel, Buenavista, Trinidad, Ubay, Inabanga, Tubigon, ug Tagbilaran City.
Nipasabot si Pobe nga ang pag-ila sa mga lugar sa maong category subay sa assessment sa Philippine National Police ug Armed Forces of the Philippines atol sa laing hugna sa Regional Joint Security Control Center meeting tungod sa kainit sa dagan sa politika sa maong mga dapit.
Gitataw hinuon sa Comelec Director nga dili kini ikaalarma o ikahadlok ang pagpaubos sa areas of concern sa usa ka dapit tungod kay giseguro lang nila nga mapatuman ang kahusay ug kalinaw ang maong lugar pinaagi sa pagpahugot sa security deployment sa mga polis ug sundalo.
Kon init ang politika, gikabalak-an sa Comelec nga mopahimulos ang mga armadong grupo nga gi-hire sa mga politiko aron hadlokon ang mga botante nga dili na hinuon mopili sa ilang gusto nga kandidato.
“Hindi naman ito alarming but for purposes only of beeping up the security requirements and deployment of troops for purposes of election, para magiging equal yung political playing field at the same time magiging peaceful yung community nayan,” matod ni Pobe.
Gibasehan sa Comelec pagpaubos sa Yellow category ang linabayay og pasangil sa mga kandidato nga nisangpot sa pagkinihaay sa korte.
Tungod niini, dako ang posibilidad nga mosaka sab ang kainit sa paglaban sa mga suporter sa ilang mga kandidato.
Gipahibawo hinuon ni Police Brigadier General Redrico Maranan, hepe sa kapulisan sa Central Visayas nga wala pa sila maka-monitor nga dunay mga private armed groups nga naglihok sa Probinsiya sa Bohol ug Cebu nga gigamit sa election.
Apan iyang giklaro nga duna silay mga nadawat nga kasayuran nga dunay mga potensiyal nga grupo nga mahimong gamiton sa mga kandidato nga maoy hinungdan nga ilang gipakusgan ang ilang kampanya batok loose firearms ug paggukod sa mga criminal gangs.
Dugang ni Maranan nga mamahimong magdugang sila og mga police personnel sa mga dapit nga gipaubos sa yellow category aron malikayan ang kasamok mugna sa kainit sa dagan sa politika.
Gimanduan niya ang tanang mga station commander ug mga ground commander sa matag lungsod ug siyudad nga nasulod sa maong category nga tutukan ang seguridad aron dili mosaka ngadto sa orange ug red category.
“Nilalagay natin yan sa yellow category just to inform us decision makers and yung ating chief of police and ground commanders that to look to that place more focus and if necessary we will put additional security forces there to insure na hindi na mag i-escalate from yellow category napupunta pa sa orange and red category,” matod ni Maranan.
Gitan-aw pa hinuon sa Comelec ug PRO 7 ang nahitabong pagpusil-patay sa usa ka barangay coordinator sa Lungsod sa Badian kon kini matumbok ba nga election related incidents. (RTB)
