ANG Department of Health (DOH) Central Visayas nipagawas og bag-ong guidelines sa criteria sa paghatag ug pagmonitor sa Performance-Based Incentives (PBI) ngadto sa mga Barangay Health Workers (BHWs) sa rehiyon.
Kini pinaagi sa Regional Circular No. 2025-0041, nga sumala sa DOH-7, nagtumong sa pagsagop ug pagpauswag sa mga probisyon sa DOH Department Order No. 2021-0304, gidesinyo sa pag-ila sa mga paningkamot sa mga BHW sa paghatod sa primary healthcare services sa ilang mga komunidad.
“This circular shall apply to the Provincial DOH Offices, City Health Offices and Municipal Health Offices, and recognized Barangay Health Workers (BHWs) eligible for performance-based incentives,” pagbasa sa usa ka bahin sa RC.
Aron mahimong kuwalipikado sa mga insentibo, ang BHW Federations sa mga probinsya ug highly urbanized cities (HUCs) gilauman nga motuman sa mga bag-ong criteria, nga dugang sa mga criteria nga gitakda sa Annex B sa DO No. 2021-0304.
Lakip niini ang pagsumite sa mga importanteng dokumento sama sa Securities and Exchange Commission (SEC) Certificate of Registration, Membership Certificate of Good Standing gikan sa SEC, proof of operational Barangay Health Workers Registration and Accreditation Committee (BHW-RAC) ug BHW Connect System.
Kinahanglan usab nga magpakita ang mga pederasyon og pruweba nga gihimo ang orientation sessions sa mga guidelines sa PBI para sa tanang Municipal ug City BHW Federations sa ilang lugar ug dokumentasyon sa mga advocacy activity atol sa BHW Day.
Dugang pa, ang mga aplikante kinahanglang mosumite sa usa ka Performance-Based Incentive Fund Utilization Report, uban sa porsiyento sa BHW sa Probinsya/HUCs nga adunay TESDA NC II Accreditation, ug uban pa.
Ang DOH-7 nipadayag nga kini nga mga sumbanan nagtumong sa pagpalambo sa accountability, efficiency, ug pagka-epektibo sa paghatod sa community-based healthcare.
Kini nga lakang subay sa Republic Act No. 7883, o ang Barangay Health Workers Benefits and Incentives Act of 1995, nga nagsiguro sa pag-ila ug pagsuporta sa mahinungdanong papel nga gihuptan sa mga BHW.
Ang lokal nga departamento midugang nga ang pagpatuman niini nga mga sumbanan makatabang sa pagsiguro nga ang mga insentibo mahatag nga patas sa mga takus nga grupo sa mga health worker sa Central Visayas. (RTB)
