NASIKOP sa kapolisan sa Sierra Bullones, Bohol ang live-in partner sa usa ka babaye nga napalgang naghikog-patay sulod sa usa ka motel sa dakbayan sa Carcar, Cebu niadtong Huwebes sa buntag.
Si Senior Master Sgt. Si Rol Wahing sa Sierra Bullones police nagkanayon nga ilang nasikop si Carlo Virador, 40, duol sa iyang gipuy-an sa Sitio Bintian, Barangay Bogsoc atol sa hot pursuit operation alas 11 sa buntag niadtong Biyernes, Mayo 6.
Si Virador ang gidudahang nipatay sa biktima nga si Maryjane Alia, 36, teller sa Swertres nga taga San Fernando, Cebu.
Matod ni Wahing nga si Virador niangkon sa paghimo sa krimen gumikan sa selos. Giangkon usab niya nga nagplano siya nga mo-surrender sa mga otoridad apan una siyang nadakpan sa kapulisan.
Giingong giangkon ni Virador nga samtang sulod sa lawak sa motel, iyang gikompronta ang biktima dihang nakita niya ang text message sa usa ka lalaki sa iyang cellphone nga niresulta sa init nga panaglalis.
Dayon giingong gisumbag sa suspek ang dughan sa biktima ug giluba kini sa iyang mga kamot.
“Dihay ni text sa babaye unya nangutana siya og kinsa to. According sa babae kuno iyang igsuon. Iya kuno gikuha agg cellphone unya basa niya lahi man kuno ang mga message unya medyo makapaselos gyud kuno ba,” ni Wahing.
Matod ni Wahing, daling miikyas si Virador sa motel ug nisakay og bangka gikan sa dakbayan sa Sugbo paingon sa Tubigon.
Dugang pa ni Wahing nga nakontak sila sa kapulisan sa Carcar niadtong Huwebes sa gabii nga nagpahibawo nga ang suspek gituohang miikyas paingon sa ilang lungsod sa Sierra Bullones.
“Base sa ilang imbestigasyon, nahibaw-an nila nga taga Sierra Bullones ni,” matod ni Wahing.
Ang Sierra Bullones ug Carcar Police Station nipakatap dayon og team aron masikop ang suspek human makompirmar nga niabot kini sa iyang balay.
Si Virador lumad nga taga lungsod sa Sierra Bullones apan nagtrabaho sa usa ka pabrika sa semento sa San Fernado, Cebu.
Gipaubos siya sa kustodiya sa Sierra Bullones police samtang nagpaabot sa iyang pagbalhin sa Carcar City ug ang suspek pasakaan og kasong murder. (RTB)
