ANG mga trak, bus ug uban pang dagkong mga sakyanan gidid-an una sa pag-agi sa bag-ong Clarin Bridge sa Loay nga giablihan kaniadtong Biyernes sa hapon, Mayo 6 matod sa usa ka opisyal sa Department of Public Works and Highways (DPWH).
Ang hepe sa DPWH Third Engineering District nga si Magiting Cruz nipasabot nga ang temporaryo nga pagdili gituyo aron mapugngan ang paghuot tungod kay usa ra ka lane sa taytayan ang una nga ablihan.
Ang DPWH magsirado sa usa ka lane sa taytayan aron mahatagan og dalan ang pag-aspalto sa mga approach nga himuon matag usa ka lane.
Target sa DPWH nga mahuman ang aspalto sa unang semana sa Hunyo aron maablihan ang duha ka lane sa taytayan.
Ang bag-ong estraktura maoy mopuli sa mga dekada na nga Clarin Bridge nga nahugno niadtong Abril 27 kauban ang 15 ka mga sakyanan ug mipatay sa upat ka tawo.
Gibanabana sa mga awtoridad nga ang tulay nga gitukod kaniadtong 1970s nahagsa tungod sa pagkatiguwang na niini ug sobra ka bug-at nga karga sa mga salakyanan.
Matod ni Cruz, wala sila mopahigayon og bisan unsang seremonyas sa pag-abli sa bag-ong modernong tulay sa unang higayon niadtong Biyernes sa hapon.
Siya niingon nga ang pormal nga inagurasyon ipahigayon sa dili pa si Presidente Duterte mokanaog sa katungdanan sa katapusan sa Hunyo niining tuiga.
Sa laing bahin, gipasaligan ni Cruz ang publiko sa kaluwasan sa tulay nga nag-ingon nga ang mga kontraktor migamit og modernong disenyo alang sa bag-ong imprastraktura.
Namatikdan niya nga usa kini ka suspension bridge nga nagtubag sa mga kabalaka sa publiko nga ang istruktura daw kulang sa pundasyon gikan sa ilawom niini.
Ang estruktura nga 104 metros ang gitas-on ug 6.7 metros ang gilapdon lakip ang sidewalk nga usa ka basket-handle, Nielsen-type bridge. Ikaduha kini sa nasod sunod sa Bamban Bridge sa lalawigan sa Tarlac. (RTB)
