MOKABAT sa 15 ka vote-counting machines ang mi-malfunction atol sa final testing ug sealing sa VCMs sa polling precincts sa tibuok Bohol niadtong Huwebes, Mayo 5.
Matod ni manlalaban Eddie Aba, Bohol Commission on Elections (Comelec) officer, nga ang mga depektosong VCM gipadala sa dakbayan sa Sugbo aron ayuhon.
Usa ka VCM matag usa sa Antequera, Batuan, Dagohoy, Danao, Pilar, Ubay ug Jagna ug duha ka VCM matag usa sa Guindulman, Inabanga, Trinidad ug Tagbilaran ang naguba.
Ang mga depektoso nga makina giilisan gamit ang 15 sa 30 ka contingency VCM nga gigahin alang sa Bohol.
Hinuon, namatikdan ni Aba nga kinahanglan pa nga ibalik sa Bohol ang mga nagdaot nga VCM sa higayon nga ayohon aron madugangan ang mga backup machine sa probinsya.
“Duna man tay contingency VCMs pero kinahanglan mo balik gyud diri tong naguba kay mawala man gyud ta og naay standby nga contingency VCMs,” matod pa.
Samtang, 1,708 ka mga VCM ang naselyohan human kini na-clear aron magamit atol sa mga botohan ugmang adlawa sa Bohol. (RTB)
