GIPADAYAG ni Dr. Jeah Pondoc, Officer-in-Charge sa Tagbilaran City Health Office (CHO) nga huwaton nila ang guidelines gikan sa national government kabahin sa second booster shots una kini ipatuman dinhi sa dakbayan.
Nakigtagbo na sila sa mga opisyal sa nasudnong kagamhanan ug gituki ang kabahin sa second booster shots sa COVID-19 vaccine.
Gihimug-atan hinoon ni Pondoc nga kun sugdan na sab dinhi sa Tagbilaran City ang paghatag og second dose sa booster shot andam ra ang siyudad ug wala ra’y problema kay naa ra ang mga vaccination sites ug wala’y giusab niini.
Ang Food and Drug Administration (FDA) miaprubar sa second booster dose sa COVID-19 vaccine alang sa mga katiguwangan, immune-compromised, ug frontline health workers.
Sa National Capital Region, gisugdan ang vaccination sa second dose sa booster shot apan giuna nila kadtong mga indibidwal nga immune-compromised sama sa pasyente nga nakadawat og organ transplant, cancer patients ug kadtong nag-inom og immunosuppressants, HIV/AIDS patients ug kadtong primary immunodeficiency.
Samtang pabiling dakung hagit sa kagamhanan sa siyudad ang pagkumbinsir sa mga tawo nga magpa-booster shot tungod kay kadaghanan nila kontento na sa first ug second dose sa COVID-19 vaccine.
Apan ang kagamhanan sa syudad sa Tagbilaran wala ra mabalaka niini tungod kay suma pa dunay mga pamaagi aron pagkumbinsir sa mga tawo nga magpabakuna ilabi na booster shot. (RTB)
