GIBANSAY-BANSAY ang mga mag-uuma sa Kabisay-an sa “Farm Planning” ug “Record Keeping” sigon sa Bol-anong assistant sceretary sa DA-Visayas Atty. Salvador Diputado.
Sigon ni Diputado nga tumong sa maong programa nga giumol sa Department of Agriculture (DA) nga magiyahan ang mga mag-uuma alang sa pag-monitor sa ilang mga produkto ingon man usab ang pagkab-ot sa maayong pagplano sa ilang gipananom.
Dugang ni Diputado nga gipaubos usab ang mga mag-uuma sa Vermi Composting Seminar ug nahisgotan usab ang pipila ka suliran sa mga mag-uuma ug usa na niini ang kamahal sa abunong kemikal nga maoy usa sa mga kakulian sa ilang pagpanguma.
“Tungod sa maong senaryo, gipaambit ngadto kanila ang pagbuhat og kaugalingong abuno pinaagi sa wati o Vermi Composting,’ sigon ni Diputado.
Una na nga gibutyag ni Diputado nga hatagan gyud og lapad nga programa ang mga mag-uuma gumikan kay mao kini ang instrumento sa mga pagkaon nga naa sa lamesa.
Gilusad na usab ang programa sa nagkadaiyang eskwelahan kabahin sa food production program.
Gipasabot ni Diputado nga nihatag og lapad nga gibug-aton ang DA sa programa sa Department of Education nga “Gulayan sa Paaralan” pinaagi sa paghatag og mga gamit o supply ug technical assistance diin tumong niini nga masiguro ang seguridad sa pagkaon ug mapakita nga produktibo ang luna sa eskwelahan. (RTB)
