NANAWAGAN ang labing labaw nga bokal sa Bohol, Dr. Dionisio Victor A. Balite, Ph.D ngadto sa mga barangay officials nga dili ipamulitika ang paghatag sa assistance ngadto sa mga konstitwenti ilabi na niining panahon sa kalamidad.
Sumala pa ni Balite nga klaro kaayu nga supak kini sa Republic Act No. 7160 kon Local Government Code of 1991 (LGC) ang pagpili-pili sa hatagan sa tabang.
Gipasabot sa labaw’ng bokal nga sa “non-partisan” requirement sa LGC, ang mga punong barangay gitahasan sa pag-organisar ug pagpanguna sa usa ka emergency group kon kinahanglanon alang sa pagmintenar sa kahusay og kalinaw o bisan unsang okasyon sa emehensiya sulod sa barangay.
Magamit usab sa kapitan ang uban pang mga gahum ug buhaton ang uban pang mga katungdanan ug gimbuhaton nga mahimo nga itakda sa balaod o ordinansa sa usa ka dapit.
Miingon si Balite nga gani ubos sa Omnibus Election Code labi na sa Section 38 kini nagmando nga ang piniliay sa barangay kinahanglan nga non-partisan ug kinahanglang ipahigayon sa paspas ug barato nga paagi.
Dugang sa maong balaod nga walay bisan kinsa nga muduso sa usa ka sertipiko de kandidatura nga magrepresentar o motugot sa iyang kaugalingon nga irepresentar ingon usa ka kandidato sa bisan unsang partido sa politika o bisan unsang uban nga organisasyon; ug wala’y partido sa politika, grupo sa politika, komite sa politika, sibilyan, relihiyoso, propesyonal, o uban pang organisasyon o organisado nga grupo sa bisan unsang kinaiyahan ang mangilabot sa iyang nominasyon o sa pag-file sa iyang sertipiko sa kandidatura, o paghatag tabang o suporta, direkta o dili direkta , materyal o kon dili, pabor sa o batok sa iyang kampanya alang sa pagpili.
Subay niini, gusto ni Balite nga muhimo sa dinaliang imbestigasyon ang Department of Social Welfare and Development (DSWD) pinaagi sa ilang mga city og municipal offices tungod sa iyang nadawat nga taho sa limitasyon sa mga benipesyaryo sa government assistance programs diin kadto rang dool sa luwag ang nakapahimulos.
Kinahanglan nga walay pili ug unahon ang mga persons with disabilities (PWDs), senior citizens, balo nga nagsuporta sa ilang kabataan, ug pamilya nga ang kita ubos kaayu sa poverty line, sigon niini. (RTB)
