DETALYADONG gipahibaw ni 2nd district Congw Vanvan Aumentado ang iyang mga pundo nga iyang gibubo ug mga proyektong na-implementar sa iyang distrito sulod sa 3 ka tuig.
P5.8B suma total ang pundong gibubo alang sa proyektong imprastraktura pinaagi sa DPWH. Niadtong 2022, P1.2B ang gigahin alang sa 201 ka mga barangay sa Segundo distrito samtang 205 ka barangay ang nagrasyahan gikan sa suma total P1.5B sa 2023. Sa niageng tuig, P3.1B ang pinakadakong pundo nga gibutang arun sa pagsemento sa mga kalsada, katukuran sa school building, Multi-purpose Building ug uban pa.
Sa tuig 2024, 3,134 ka mga beneficiaries ang natabangan pinaagi sa AICS program sa DSWD kon diin niabot og P58,978,700.00 ang gigahin sa kongresista.
Sa DOH-MAIFIP, 1,630 ka mga benepisaryo ang natabangan sa ilang ‘medical concerns’ ug ubang nagkinahanglan sa ‘medical attention’ nga gipundohan og P73,700,000.00.
Niadtong 2022, Medical Assistance for Indigent Patients pa ang tawag sa maong programa nga nahimong MAIFIP o Medical Assiatance for Indigent and Financially Incapacitated Patients.
Sulod sa 3 ka tuig, gikan 2022-2024 niabot na og P157,088,140.00 ang gigahin arun matabangan ang panginabuhian sa 34,943 beneficiaries.
Ang mga vocational courses wala usab pasagde sanglit dunay 942 ka mga beneficiaries ang natabangan sa pundong P20,500,000.00.
Sa laing bahin, ang Tulong Dunong program sa CHED-TDP nigahin og P9,000,000.00 sulod sa 3 ka tuig alang sa 594 beneficiaries samtang ang CHED-SMART dunay P3,000,000.00 (2023) alang sa 120 beneficiaries. (Kahlil Lester O. Camba)
