NAGPAKITA sa ilang todo suporta ang mga dumadapig ni Aksyon Demokratiko presidential bet, Manila City Mayor Isko Moreno sa dihang nahidangat sila dinhi sa Bohol.
Nipahigayon sila sa usa ka campaign rally sa Catigbian Gym uban sa iyang vice presidential candidate nga si Doc Willie Ong, mga kandidato pagka senador nga sila Dr. Carl Balita, Samira Gutoc, Atty. Jopet “Ipaglaban Mo” Sison ug kanhi DAR Sec nga si Atty. John Castriciones.
Kini human sa courtesy call nila ngadto kang Catigbian Mayor Abeth Mandin inubanan sa 2nd nominee sa KOOP Kampi partylist nga si kanhi CDA Administrator Benjie Oliva.
Mainiton usab sila nga gidawat didto sa Carmen kon diin nakitagbo sila sa mga dumadapig.
Dunay gipahigayon nga rally sa lungsod sa Calape homan sa courtesy call nila ngadto kang Calape Mayor Nelson N. Yu, C.E.
Suma pa sa mga tigpaniid sa politika, dili makompyansahan si Isko Moreno gumikan sa gipakita nga kusog sa iyang mga dumadapig nga nasaksihan didto sa Catigbian, Carmen ug Calape.
Sa gabie, malampuson nga gipahigayon ang Bilis Concert didto sa Old Airport ning atong dakbayan.
Gipangunahan kini sa anak ni Isko nga si Joaquin Domagoso inubanan nila Luke Mejares, Boobsie Wonderland ug Mocha Uson kinsa nagdala usab sa Mocha partylist karong 2022 piniliay.
Nipakita usab sa ilang mga abilidad ang mga batan-ong mga artista gikan sa Sugbo.
Atol sa iyang mensahe sa mga katawhan sa Catigbian, gisaysay ni Mayor Isko nga dili na angay magpadayon ang away sa Pula ug Yellow/Pink nga pila ka tuig na nga nasaksihan sa mga tawo.
Dugang pa niya mas maayo nga dili mahimong “proxy war” ang piniliay sanglit ang social services ug crisis management man ang angay pakadak-an karong panahona. (Kahlil Lester O.Camba)
