GIDEKLARAR sa kagamhanan nga “Buwan ng Kalutong Pilipino” o “Filipino Food Month” ang buwan sa Abril sumala sa labing labaw nga bokal sa Bohol Dr. Dionisio Victor A. Balite, Ph.D.
Sigon ni Balite nga ubos sa Proclamation No. 469 nga gilagdaan ni Presidente Rodrigo Duterte, gimanduan ang Department of Agriculture (DA) ug ang National Commission for Culture and the Arts (NCCA) nga pangunahan ang tinuig nga selebrasyon alang sa “Filipino Food Month”.
Gipasabot ni Balite nga nakalatid sa proklamasyon nga ubos sa 1987 Constitution, kinahanglang siguradohon sa gobyerno nga mahatagan og kamahinungdanon ug ma-preserbar ang kultura sa nasod.
Giingon usab niini nga angay hatagan og pag-ila ang ‘culinary tradition’ sa Pilipinas ug angay mahatagan og promosyon aron masigurong mapasa kini sa sunod nga henerasyon.
Ubos sa National Culture Heritage Act of 2009, gi-ila ang ‘culinary tradition’ isip parte sa cultural heritage sa nasod, dugang ni Balite. (RTB)
